Германиянинг Бад-Дюбен шаҳри маъмурияти инвесторларни жалб қилиш мақсадида XIII асрга оид Шнадитс қасрини атиги 1 еврога сотувга қўйди. Бироқ тарихий бинони тўлиқ таъмирлаш учун камида 20 миллион евро маблағ талаб этилади. Бу ҳақда «Билд» нашри хабар берди.

Тахминан 1237 йилда қурилган қаср Саксония федерал еридаги Бад-Дюбен шаҳрининг Шнадитс ҳудудида жойлашган. Умумий майдони 1012 квадрат метр бўлган бинода яшаш хоналари, рицарлар зали ва иккита минора мавжуд. Қаср ёнида 1794 йилда барпо этилган боғ ҳам бор.

Шаҳар мери Матиас Mit’нинг таъкидлашича, қаср нафақат шаҳар, балки бутун Саксония учун муҳим тарихий объект ҳисобланади. Унинг сўзларига кўра, бинони қайта тиклаш бўйича аввал ҳам кўплаб режалар ишлаб чиқилган, бироқ бюрократик тўсиқлар сабабли улар амалга ошмаган.

Мер қаср ҳудудида меҳмонхона, қариялар уйи, ўқув маркази ёки интернат мактаби ташкил этиш мумкинлигини билдирган. Бироқ бунинг учун бинони фойдаланишга тайёрлаш ва кенг кўламли таъмирлаш ишлари талаб этилади.

Ҳозирда Шнадитс қасрини сақлаб қолиш ва қайта тиклаш учун инвестор изланмоқда. Уни тўлиқ таъмирлаш қиймати камида 20 миллион еврога баҳоланмоқда.