Тефал. Ҳозирда электр чойнаклар халқ орасида худди шу ном билан аталади. Бу сўз аслида электр чойнак маъносини бермайди, у халқаро бренд, савдо белгиси. Бу белги остида фақат электр чойнаклар эмас, турли маиший ускуналар ва идишлар ишлаб чиқарилади.

Памперс постсовет давлатларида ўз маҳсулотларини шунчалик фаол реклама қилдики, бошқа брендлар унинг соясида қолиб кетди. Натижада ҳар қандай таглик маҳсулотларини памперс деб атайдиган бўлиб қолдик.

Биз ҳозирда жакузи деб номлайдиган ванна тури аслида шу ванналарни биринчи бўлиб ишлаб чиқарган компания номи бўлган. Компанияга 1915 йилда Италиядан келган, фамилияси Жакуззи (тўғри ўқилиши Якутси) бўлган ака-ука муҳожирлар томонидан асос солинган.

Фён — тоғлардан водийларга эсадиган илиқ ва қуруқ шамол. ХХ аср бошидан бери Германияда Фöн бренди остида сочни қуритувчи мосламалар ишлаб чиқарила бошланди. Бу сўз нафақат немис тилида, балки рус ва ўзбек тилларида ҳам шу мосламани атайдиган сўзга айланиб улгурди.1970 йилларда СССР бозорида илк маротаба қоғоздан нусха кўчириш машиналари пайдо бўлди — унинг номи Херох эди. Эндиликда эса аксар постсовет мамлакатларида ушбу хизмат тури ксерокопия деб аталади.

Одатда кўп қаватли уйлар ҳожатхонасида ишлатиладиган қурилма — унитаз ҳам қачонлардир компания номи бўлган. СССР пайти айнан Унитас бренди мамлакатга ушбу турдаги сантехникани олиб кирган.

Фломастер сўзи ХХ асрнинг иккинчи ярмида рангли сиёҳ ва маркерлар ишлаб чиқарувчи Фло-Мастер савдо белгисидан келиб чиққан.

Юқоридаги баъзи атамалар оммалашишига уларнинг асл номи айтишга қийинлиги ҳам сабаб бўлган бўлиши мумкин. Халқ тили соддаликни ёқтиради.

• Бренд