Жорий йилнинг 2 декабрь куни соат 10:50 ларда Гулистон шаҳар, Тараққиёт маҳалласи ҳудудида жойлашган “Бек Family Cafe” МЧЖга қарашли умумий овқатланиш шохобчаси ошхонасида мавжуд бўлган ўчоққа ёнғин хавфсизлиги қоидаларига зид равишда уланган 50 литр ҳажмдаги суюлтирилган пропан газ баллонидан сизиб чиққан углеводород гази ва ҳаво аралашмасининг чақнаши оқибатида портлаш юзага келган эди. Ушбу ҳолат бўйича пойтахт ИИВ расмий баёнот берди.

Унга кўра, ҳодиса оқибатида жами 29 нафар фуқаролар турли даражадаги куйиш жароҳатлари билан Республика шошилинч тиббий ёрдам илмий маркази Сирдарё вилояти филиалига ётқизилган.

Олган тан жароҳатлари натижасида 3 нафар фуқаро вафот этган. Беморлардан 5 нафарининг аҳволи қониқарли бўлгани сабабли тиббий ёрдам кўрсатилиб, уйларига жавоб берилган, қолган беморларга малакали тиббий хизмат кўрсатилмоқда.

Мазкур ҳолат юзасидан Ўзбекистон Республикаси ЖКнинг 192¹¹-моддаси 1-қисми, 257-моддаси 2-қисми “а,б“ бандлари ва 259-моддаси 2-қисми “а,б“ бандлари билан жиноят иши қўзғатилган бўлиб, “Бек Family Cafe” МЧЖ мансабдор шахсларининг 3 нафари процессуал тартибда қамоққа олинган.

Ҳозирда, Ички ишлар вазирининг ўринбосари – ИИВ ҳузуридаги Тергов департаменти бошлиғи Рамазон Ашропов бошчилигида ҳамкор идораларнинг мутахассисларидан ташкил топган тергов гуруҳи томонидан барча зарурий тергов ҳаракатлари амалга оширилмоқда.

“Тергов жараёни назоратга олинган бўлиб, якунига кўра қонуний қарор қабул қилиниши таъминланади ҳамда жамоатчиликка ахборот берилади”, – дейилади баёнотда.

• ИИВ
• JK
• Сирдарё
• portlash