Давлат хавфсизлик хизмати ва Ички ишлар вазирлиги ходимлари ҳамкорлигида ўтказилаётган криминоген вазиятни барқарорлаштириш, уюшган жиноятчилик ва гиёҳвандлик воситалари савдосига қарши курашиш кенг кўламли тезкор-қидирув тадбирлари давом этмоқда.

Тошкент вилоятининг Чиноз туманида ўтказилган тезкор тадбирда Бекобод шаҳрида яшовчи, 1980 йилда туғилган муқаддам гиёҳвандлик воситалари савдоси билан боғлиқ жинояти учун судланган шахс шартли харидорга 200 г “гашиш” моддасини 50 млн сўмга сотган вақтида ашёвий далиллар билан ушланган.

Тезкор тадбир давом эттирилиб, наркосавдогар ушбу пул маблағидан 6,9 млн сўмини 1989 йилда туғилган ҳамшаҳарига берган вақтида у ҳам ушланиб, унинг ёнидан 500 г “гашиш” моддаси олинган.

Ҳозирда уларга нисбатан Жиноят Кодексининг 273-моддаси 5-қисми билан жиноят иши қўзғатилиб, тергов ҳаракатлари олиб борилмоқда.

Бекобод тумани ҳудудида Cobalt русумли автотранспорт воситасида йўловчи сифатида кетаётган Тошкент шаҳрида яшовчи, 1973 йилда туғилган шахснинг ёнидан 600 гр “опий” моддаси олинган.

У мазкур гиёҳвандлик воситасини Бекобод шаҳрида истиқомат қилувчи, 1986 йилда туғилган танишидан 5 минг АҚШ доллари ҳамда 5 млн сўмга сотиб олганлиги аниқланиб, тезкор тадбир давом эттирилганда, бекободлик наркосавдогарнинг яшаш хонадонидан  1 кг 47 г “опий” ҳамда унинг 2 нафар жиноий алоқаларидан эса 335 г “опий” моддаси олинади.

Аниқланишича, ушбу гиёҳвандлик воситалари Тожикистондан контрабанда йўли билан олиб келинган.

Уларга нисбатан Жиноят Кодексининг 246-моддаси 2-қисми ва 273-моддаси 5-қисми билан жиноят иши қўзғатилди.

• ДХХ
• Ҳамкорлик
• ИИВ
• Жиноят
• Toshkent viloyati