Ўз мустақиллигини эълон қилган Донецк ва Луганск Халқ Республикаларида Россияга “қўшилиш” бўйича зудлик билан референдум ўтказилиши кутилмоқда. Бу ҳақда “Медуза” нашри хабар берди.

Қайд этилишича, бундай таклиф билан 19 сентябрь куни икки вилоят жамоат палаталари ДХР ва ЛХР раҳбарлари Денис Пушилин ҳамда Леонид Пасечникка мурожаат қилган. ДХР ва ЛХР раҳбарлари бундай референдумларни 2022 йилнинг март ойида ўтказиш режаларини ўзаро муҳокама қилади.

ДХР раҳбари Денис Пушилин ЛХР раҳбарига референдумларга биргаликда тайёргарлик кўришни таклиф қилди. Пушилин ўзининг Telegram каналида Леонид Пасечник билан суҳбати акс этган видеони жойлаштирди. Ёзувда ДХР раҳбари “баъзи ҳаракатларни синхронлаштириш” ва ўз-ўзини мустақил, деб эълон қилган республикалар ҳокимияти саъй-ҳаракатларини бирлаштиришни таклиф қилган.

Херсон вилоятининг ишғол маъмурияти ҳам имкон қадар тезроқ Россия билан “қўшилиш” бўйича референдум ўтказишни истаётганини билдирди. Бу ҳақда Херсон вилоятининг Россия назоратидаги маъмурияти раҳбари ўринбосари Кирилл Стремоусов баёнот берди. Унинг сўзларига кўра, босиб олинган ҳудудларда “Россия кетишидан қўрққан” ва “ўзларини ташлаб кетмаслигига ишонч ҳосил қилишни истайдиган” аҳоли референдум ўтказишни сўрамоқда.

Россия Федерацияси Давлат Думаси ЛХРда референдум 2022 йилнинг кузида ўтказилишига рухсат берди. Бу ҳақда Давлат Думаси депутати Виктор Водолацкий маълум қилди. Депутатнинг сўзларига кўра, ЛХРнинг сайлов тизими референдумга 100 фоиз тайёр (у ДХРда референдум ўтказиш масаласига изоҳ бермаган). ДХР ва ЛХР жамоат палаталарида овоз бериш санаси ҳозирча эълон қилинмади. Шу билан бирга, ДХР палатасига овоз бериш бир неча кунга чўзилиши мумкинлиги айтилди.

Украина ҳукумати Донецк ва Луганск ҳам Қрим каби Украина ҳудуди ҳисобланади, деб жавоб берди. Бу ҳақда Украина президенти девони раҳбари маслаҳатчиси Михаил Подольяк маълум қилди.

“Россия пропагандистлари “референдум”ни даво сифатида севиб қолишди. Уларга ёмон хабарим бор. Глобал консенсус ва халқаро ҳуқуқ мавжуд. Бу аниқ: Донецк, Луганск, Қрим бу Украинадир. Байроқларни қайта бўяшга уринишлар уйдирма бўлиб, биз учун ҳам, ҳамкорлар учун ҳам ҳеч нарсани ўзгартира олмайди”, – деди у.

Сентябрь бошида Кремлга яқин манбалар Россия раҳбарияти Украинанинг Донецк, Луганск, Запорожье, Харков ва Херсон вилоятлари босиб олинган ҳудудларини “аннекция қилиш” бўйича референдумга тайёргарликни тўхтатганини маълум қилганди. Расмийлар бу қадамга Украина қўшинларининг сентябрь ойи бошида муваффақиятли қарши ҳужумини сабаб сифатида кўрсатган.

• Donetsk
• Lugansk
• Referendum\
• Россия
• Украина