Кеча, 11 апрель куни соат 21:53 да А-373 Тошкент–Ўш автомобиль йўлининг Қамчиқ довонидан ўтган қисмида Тошкент—водий йўналишида ҳаракатланган Чанган русумли автотранспорт воситасида ёнғин юзага келган.

Ёнғинга автомобиль юкхонасида бўлган электроскутернинг қувватлагичида юзага келган қисқа туташув сабаб бўлган. Бу ҳақда Фавқулодда вазиятлар вазирлиги хабар берди.

Вазият ҳақида Қамчиқ махсус қидирув, ёнғин-қутқарув бошқармасига хабар қилинган.

Шунга кўра 2 та ёнғин-қутқарув экипажи соат 22:09 да воқеа жойига етиб бориб, ёнғин соат 22:11 да ўраб олинган ва соат 22:12 да ёнғин тўлиқ бартараф этилган.

Ёнғин оқибатида автотранспорт воситасининг салон қисми ҳамда юкхонаси ёниб зарарланган. Тезкор ҳаракатлар натижасида юкхонада бўлган 18 та велосипеддан 9 таси ва 4 та электроскутердан 1 таси ёнғиндан сақлаб қолинган.

Хабарга кўра, ҳодиса оқибатида тан жароҳати олган ва ҳалок бўлганлар йўқ.

• Қамчиқ
• ёнғин
• yuk mashinasi