Биз одатда машҳур ва нуфузли инсонлар ҳаётига хавас билан назар ташлаймиз. Аммо бу каби ҳаётнинг ҳам ўзига ҳос камчиликлари етарлича. Машҳур инсонлар ҳеч қачон ёлғиз юра олмайдилар, уларни доим ва ҳар ерда, жумладан расмий маросимлар, сайрлар ва дўкон айланиш чоғида ҳам бир гуруҳ қўриқчилар ҳимоя қилиб юради.

Биз бугун дунёдаги энг қаттиқ қўриқланадиган 10 нафар инсон ҳақида суҳбатлашамиз.

Дональд Трамп

Дональд Трамп замонамизнинг энг машҳур ва нуфузли инсонларидан бири. Айрим маълумотларга кўра, АҚШнинг собиқ президенти ва унинг оиласини қўриқлаш учун ҳар куни тансоқчиларга 1 миллион доллар пул сарф қилинади. Қизиғи шундаки, АҚШнинг собиқ президенти ўз вақтида Буюк Британияга ташриф буюрган пайтида унинг тансоқчилари учун Меган Маркл ва шаҳзода Гаррининг тўйи куни тансоқчиларга сарфланган пулдан 4 марта кўпроқ маблағ кетказилган экан. Бу эса 24 миллион долларни ташкил қилади. Трамп президент бўлган вақтларда интернет тармоқларида сиёсатчи ва унинг рафиқасини кузатиб бораётган зирҳланган лимузин ёнидаги қўриқчи қизғин муҳокамаларга сабаб бўлганди. Эътиборли фойдаланувчилар ва ОАВ қўриқчилардан бирининг қўли сунъий эканлиги, қўлнинг нотабиий ҳолати ва сайр пайтида бир марта ҳам қимирламаганига эътибор қаратганлар. Америка нашрларининг айтишича, қўриқчининг ўз қўли пальто остидаги пистолет тепкисида кутилмаган ҳолатлар учун тайёр турган.

Мана буни ҳақиқий профессионализм деса бўлади.

Леди Гага

Ҳалқаро миқёсидаги продюсер, актриса ва хонанда Леди Гаганинг муҳлислари шунчалар кўпки, улар орасида ақлдан озган шинавандалар ҳам учраб туради. Шу сабабли ижодкор ўз қўриқчиларини бирма-бир саралаб олган. Одатда у кўчадаги оддий сайрга ҳам девордек салобатли ва қора либосли эркаклар қуршовида чиқади.  Леди Гага мухлислари қўриқчилардан бирининг ўтмишини ҳам аниқлашга муваффақ бўлганлар. Маълумотларга кўра, тансоқчилардан бири 2005 йилда "Жаноб Европа" танлови ғолибига айланган экан. Қарангки, ижодкор ўз ҳаётини нафақат кучли, балки чиройли қўриқчиларга ишониб топширади. Аммо кейинчалик ушбу тансоқчи хонанданинг ўзи томонидан бўшатиб юборилди. Айтишларича, бунга қўриқчининг хонанда Адель билан ҳам ишлай бошлагани сабаб бўлган. Леди Гага қўриқчиларнинг қандай тезкорлик билан ишлашини кўп ҳодисалар исботлаб бериши мумкин. Хонанда мехмонхонадан чиқиб кетаётган пайти унга томон қўлида дафтар ва ручка кўтариб олган эркак югуришни бошлаган. Таҳминларга кўра, у ижодкордан дасхат сўрамоқчи бўлган. Аммо қўриқчилар уни шу дақиқадаёқ қўлга олиб, полга ётқизганлар. Ким билади, балки унинг нияти бутунлай ўзгача бўлгандир?

Бейонсе ва Jay-z

Машҳур оилавий жуфтлик, нуфузли хонандалар – Бейонсе ва Jay-z кўп бор таҳдидлар ҳамда ҳужумлар билан тўқнаш келишган. Кунларнинг бирида саҳнада чиқиш қилиб турган пайтларида у ерга шифакайф мухлис чиқиб олган ва тартибсизликка сабаб бўлган. Ҳайриятки, бу одам ижодкорларга ҳеч қандай зарар етказмади. Қўриқчилар уни тезкорлик билан саҳнадан пастга олиб тушганлар. 2014 йилдаги тур пайтида эса қўриқчилар гуруҳи ҳаддан ташқари кучайтирилган. Жуфтлик Американинг 16 та шаҳрида ва Франциянинг иккита шаҳарида чиқиш қилган. Мазкур турни ўтказиш учун жуфтлик билан бирга 500 нафар тансоқчи йўлга чиққан. Улардан 16 таси бутун сутка давомида хонандаларнинг ёнидан бир қадамга жилмаган.

300 нафар қўриқчи мухлислар кўп бўлган жойларда тартиб ўрнатишга маъсул бўлса, яна 50 таси саҳнани қўриқлаб турган.

Айримлар мазкур турни ҳарбий операция билан таққослаган ҳам эдилар. Сабаби қўриқчиларга нисбатан талаб ҳақиқатан ҳарбийларга ҳос бўлган. Бундан ташқари, тансоқчилар уларни безори паппараццилардан ҳам ҳимоя қилиб турган. Бу ўринда фоторепортёрлар ва хонандаларнинг тансоқчилари билан боғлиқ бир нечта жанжал келиб чиққан.

Ангела Меркель

Ангела Меркель Германия тарихидаги биринчи ва ягона канцлер аёл бўлиб қолмоқда. Американинг “Форбес” журнали уни бир неча марта "Дунёдаги энг катта таъсирга эга бўлган аёл" сифатида эътироф этган. Бу каби нуфуз билан яшайдиган инсоннинг қўриқчилари ҳам шунга мос бўлиши табиий, албатта. Собиқ канцлернинг хавфсизлиги билан ўз вақтида жиноятчилик полицияси шуғулланган. Улар федерал ҳукуматга бўйсунадиган оддий полиция эмас, ички ишлар вазирлигига бўйсунувчи инсонлардан иборат бўлган. Маркелнинг шахсий тансоқчилари билан махсус департамент иш олиб борган. Бу жамоа номи “Ёрдам гуруҳи” дея аталган.

Қўриқчилар учун ҳос бўлган мукаммал жисмоний тайёргарлик, метиндек бардош, ўқ узиш қобилияти ва тезкорликдан ташқари собиқ канцлер тансоқчиларининг ҳар бири мутахассис шифокорлар орасидан танлаб олинган. Улар керакли пайтда Ангела хонимга биринчи тиббий ёрдамни зудлик билан кўрсата олишлари керак эди. Жуда ажойиб ва антиқа усул, шундай эмасми?

Дэвид ва Виктория Бекхэм

Машҳур инглиз футболчиси ва британиялик хонанда оиласи мухлислар орасида жуда ҳам машҳур. Айнан шу сабабли ҳам уларнинг тансоқчилари ҳамиша огоҳ бўлиб юришлари керак. Оила ўз фарзандлари ҳавфсизлиги ҳақида ҳам қаттиқ қайғуради. Кунларнинг бирида Девид айрим пайтлари рафиқаси ва болалари билан бегона одамларсиз сайр қилиш орзуси ҳақида гапирган эди. Аммо футболчи паппараццилар ва мухлислар эътибори бунга имкон бермаслигини ҳам яхши билади. Шу сабабли ўз рафиқаси билан бирга ҳамиша тансоқчи хизматидан фойдаланади.

Ҳар не қилганда ҳам бу уларнинг шахсий хавфсизликлари учун керак. Бекхемлар оиласини бутун сутка давомида қуролланган тансоқчилар назорат қилиб туради. Оиланинг тўнғич фарзанди Бруклин 15 ёшга тўлгач, унинг ота-онаси йигитча учун ҳам алоҳида тансоқчи ёллашга мажбур бўлганлар. Ишга қабул қилинган эркак АҚШ армияси таркибида махсус лавозимда ишлаган ва бошқа одамлар ичида яққол кўзга ташланмайди. Бу каби эҳтиёткорлик Бруклинни дўстлари даврасида дам олиши ва футбол билан шуғулланишига ҳалал бермаслиги учун керак бўлган.

Ким Чен Ин

КХР нинг олий раҳбари  бўлмиш Ким Чен Ин 2011 йилдан бери мазкур лавозимда фаолият олиб боради. Ким Чен Ин Сингапурга борган вақтида қўриқчиларнинг ўзига ҳос ҳаракати кўпчиликни лол қилиб қўйган эди. Улар Ким Чен Ин машинасининг ташқи томонини ўраб олганча югуриб юришган.

Айтиш керакки, Шимолий Корея раҳбарини қўриқлаш жараёни 3 босқичга бўлинган.

Машина атрофида югураётган тансоқчилар қўриқчиларнинг илк ва энг яқин гуруҳидир. Уларни Корея ҳалқ армияси таркибидан танлаб олинган. Бу борадаги асосий талаб бўй ўлчамлари бўлиб, қўриқчининг бўйи Ким жанобларининг бўйи билан тенг бўлиши керак. Кўриш қобилиятининг ўткир эканлиги ва жисмоний тайёргарлик ҳолати ҳам ҳисобга олинади, албатта. Қўриқчининг жанг санъатидан қанчалар хабардор эканлиги, ўқ отиш пайтидаги аниқ ва тезкорлиги текширилади. Ким Чен Иннинг олд томонида 3-5 та, икки ён томонида 4-6 нафар қўриқчи ҳаракат қилади. Орқа томонга эса яна 5-6 нафар тансоқчи жойлаштирилади.

Бритни Спирс

Хонанда, актриса ва “Гремми” мукофоти соҳибаси бўлмиш Бритни Спирснинг ютуқларини санаб тугатиш жуда қийин. У замонамизнинг энг чиройли аёлларидан бири ҳамдир. Хонанданинг хавфсизлиги учун турли вақтлар давомида турли тансоқчилар жавоб берган. Уларнинг барчаси кучли жисмоний тайёргарликка эга бўлган одамлар орасидан танлаб олинган. Хонанданинг мухлислари эса бу каби ҳимоядан ҳайратга тушганлар. Бритни ҳамиша ўз хавфсизлиги ҳақида қайғуриб келган. Қўриқчилар эса уни папараццилардан ҳимоя қилишга ҳам ёрдам бера олади. Агар сураткашлар ижодкорни суратга олиш мумкин эмаслигини бир сўз билан тушунмасалар, тансоқчилар буни уларга мушт ёрдамида тушунтириб қўйишлари ҳам мумкин экан.

2014 йилда хонанда ўзининг собиқ йигити сабаб таъқиб ичида қолган эди. Шу тариқа у тансоқчилардан ҳимояни кучайтириш ва Девиднинг унга яқинлаша олмаслигини таъминлаш ҳақида талаб қила бошлади. Қўриқчилар хонанда ва йигит бир шаҳарда бўлган пайтлари ҳам доим огоҳ туришлари керак бўлган. Бу ўринда Бритнининг қўриқчиларига фақат ва фақат сабр тилаш мумкин.

Рим папаси

Рим папаси замонамизнинг яна бир машҳур инсони. У Ватикан ўлкасида умр кечиради ва бир вақтнинг ўзида бу ердаги тахт соҳиби ҳисобланади. Уни қўриқлаш билан эса Швейцариянинг гвардия қўшинлари шуғулланади. Балки антиқа либослар кийиб олган бу йигитларни шунчаки оддий инсонлар, ўрта аср қуролларини эса декор элементи сифатида қабул қилгандирсиз?

Рим папаларининг хавфизлиги 500 йил аввал айнан мана шу гвардия қўлига топширилган. Гвардия 135 нафар кишидан иборат. Унинг таркибига кириш учун йигитлар 19-30 ёш оралиғида, уйланмаган ва швейцариялик бўлишлари керак. Бундан ташқари ҳарбий кучлар таркибида ҳам машғулот ўтаган бўлиши лозим. Гвардия аъзоларидан ўқ отиш ва қўл жанги борасида маҳоратли бўлишлари талаб этилади. Қолаверса улар замонавий қуроллар ва энг қизиғи, қалампир баллончалари билан ҳам таъминланган. Йигитлар Рим папаси қўшини таркибида 3 йил хизмат қилиб бўлгач, оила қуриш ва қайтадан хизматга кириш имкониятига эга бўладилар.

Қирол Чарльз

Англиянинг марҳум қироличаси Елизавета II нинг ўғли Қирол Чарльзга шу кунга қадар кўплаб тажовузлар амалга оширилган. Шу сабабли ҳам хавфсизлик масаласи бу ерда диққат билан муҳокама қилинади.

Қиролнинг ҳаёти учун жавоб берадиган ташкилотлар сони иккита. Уларнинг биринчиси қироллик гвардияси бўлиб, бу инглиз монархининг шахсий қўриқчиларидир. Айтишларича, улар армиянинг нуфузли бўлимлари таркибидан танлаб олинади. Тансоқчиларнинг ҳар бири замонавий қуроллар билан таъминланган.

Шу сабабли ҳам бутун бошли қўриқчилар гуруҳни оддийгина декорация ўрнида қабул қилиш кулгули бўлади. Улар саройни бутун сутка давомида қўриқлаб, бу ерга бегоналар кирмаслигини таъминлаб туришади. Иккинчи ташкилот эса қироллик оиласи аъзоларини ҳимоя қилиш бошқармаси бўлиб, улар Лондон полициясининг бир қисми саналади.

Аслида бу каби вазифани бажариш осон эмас. Аввалига номзодлар ўз иш тажрибаларини намойиш қилиб берадилар. Шундан кейин уларни махсус ҳарбий машғғулотлар синови кутади. У ўзида қўл жанги, ўқ отиш, машина ҳайдаш вазифаларини жамлаган бўлади.

• машҳурлар
• қизиқарли