Электр тармоқлари билан боғлиқ фирибгарлик ҳолатлари фош этилди Фарғона, Андижон ва Наманган вилоятларида электр тармоқларига улаб бериш, аниқланган зарар миқдорини камайтириб бериш ҳамда жарималарни расмийлаштирмаслик эвазига пул талаб қилган шахслар фош этилди. Бош прокуратура ҳузуридаги Иқтисодий жиноятларга қарши курашиш департаменти маълумотига кўра, Фарғона туманида ўтказилган тезкор тадбирда Фарғона туман электр тармоқлари корхонаси муҳандиси Д.А. фуқаронинг ишлаб чиқариш цехини электр тармоғига улаб бериш, ҳисоблагич ўрнатиш ва тегишли ҳужжатларни расмийлаштириш эвазига 100 миллион сўм олган вақтида ашёвий далиллар билан ушланган.

Шунингдек, Асака туманидаги терговга қадар текширув давомида маҳаллий электр тармоқлари корхонаси ходими С.Х. тадбиркорнинг сутни қайта ишлаш цехини электр тармоғига улаб бериш ва ҳужжатларини расмийлаштиришни ваъда қилиб, 11,7 миллион сўм маблағни фирибгарлик йўли билан ўзлаштириб юборгани аниқланган.

Текширув жараёнида ушбу маблағнинг 2 миллион сўми қайтарилган. Наманган вилоятида эса электр тармоқлари корхонаси муҳандиси Б.У. фуқаронинг хонадонида электр энергиясидан ноқонуний фойдаланиш ҳолати бўйича ҳисобланган 62,4 миллион сўмлик зарарни камайтириб беришни ваъда қилиб, 400 АҚШ доллари олган вақтида қўлга олинган. Қўрғонтепа туманида ўтказилган тезкор тадбирда эса «Энергосавдо» бўлими муҳандиси И.Қ. ва бошқа шахслар фуқарога нисбатан қоидабузарлик бўйича далолатнома расмийлаштирмаслик ва жарима қўлламаслик эвазига 3 миллион сўм талаб қилгани аниқланган. Улар аввалдан 1,6 миллион сўмни қўлга киритиб, қолган 1,4 миллион сўмни олган вақтида ушланган. Ҳозирда мазкур ҳолатлар юзасидан Жиноят кодексининг тегишли моддалари асосида жиноят ишлари қўзғатилиб, тергов ҳаракатлари олиб борилмоқда.