Қарор билан “Ижтимоий реестрга киритилган оилаларга болалар нафақаси ва моддий ёрдамни тайинлаш ва тўлаш тартиби тўғрисида”ги низом тасдиқланди.

Ариза берувчи болалар нафақаси ёки моддий ёрдам тайинлашни сўраб давлат хизматлари маркази ёки ижтимоий ходим орқали мурожаат қилади.

Шунингдек, “ЯМИҲ” АТ, ЯИДХП ёки “Ижтимоий карта” мобил иловаси орқали мустақил равишда ҳам ариза бериш мумкин.

Бунда ҳар бир оила томонидан болалар нафақаси ва моддий ёрдам учун мурожаат қилиш 1 ойда 1 марта амалга оширилади.

Ойнинг 16-санасига қадар тақдим этилган аризалар мурожаат қилинган ойда, 16-санада ва ундан кейин тақдим этилган мурожаатлар кейинги ойда кўриб чиқилади.

Болалар нафақаси ёки моддий ёрдам уни тайинлашни рад этиш учун асослар аниқланмаганда ариза кўриб чиқилган ойдан кейинги ойдан “Ягона реестр” АТда автоматик тарзда тайинланади ва тўланади.

Нафақа ва моддий ёрдам “давлат таъминотидаги оила” ва “камбағал оила” тоифасидаги оилаларга улар мазкур тоифадан чиққунига қадар, “камбағаллик чегарасидаги оила” тоифасидаги оилаларга улар мазкур тоифага ўтказилган (киритилган) ойдан кейинги 6 ой учун тайинланади.

Болалар нафақаси ва моддий ёрдам миқдори қонунчилик билан белгиланади. Бунда:

“давлат таъминотидаги оила” ёки “камбағал оила” тоифасидан чиқарилган ҳолда “камбағаллик чегарасидаги оила” тоифасига ўтказилган оилага қўшимча ариза талаб этмаган ҳолда, оила аъзоларининг ҳар бирига тўғри келадиган ўртача ойлик даромади минимал истеъмол харажатларининг:

– 1 бараваридан – 1,25 бараваригача бўлганда қонунчиликда белгиланган болалар нафақаси ёки моддий ёрдам миқдорининг 75 фоизи миқдорида;

– 1,25 бараваридан – 1,5 бараваригача бўлганда қонунчиликда белгиланган болалар нафақаси ёки моддий ёрдам миқдорининг 50 фоизи миқдорида тайинланади ва тўланади.

• Болалар
• Моддий ёрдам
• Нафақа