Кечча, 24-сентябрь куни Ўзбекистон Миллий кино санъати саройида «Дарс» бадиий филмининг премьераси бўлиб ўтди, бугундан бошлаб эса картина юртимиз кинотеатрларида кенг оммага тақдим этилмоқда.

Контент маркази ва МАЪНО CИНЕМА ҳамкорлигида суратга олинган мазкур филмда сунъий можаролар ва қасослардан кўра устоз, китоб, тарбия, меҳр-оқибат ва оилавий қадриятлар асосий ўринга қўйилган. Воқеалар марказидаги Ўйқиз образи орқали қизнинг хатолари ва ҳаётий синовлари, унинг масъулиятли ҳамда етук инсонга айланиш жараёни ҳикоя қилинади.

Филм 1-октябрь — Ўқитувчи ва мураббийлар куни арафасида катта экранларга чиқарилаётгани ўзига хос маъно касб этиб, уни фарзандлар билан бирга кўриш ва ҳаётий мақсадлар ҳақида суҳбатлашиш учун мос келадиган оилавий асар сифатида баҳолашмоқда.