Олтиариқ туманида фуқаро хонадонида бўлган 1 бош сигир қутуриш касаллигига чалинган. Натижада ҳудуд туман ветеринария ва чорвачиликни ривожлантириш бўлими томонидан алоҳида назоратга олинган, аҳоли қарамоғидаги чорва ҳайвонлари клиник кўрикдан ўтказилган. Бу ҳақда Ветеринария ва чорвачиликни ривожлантириш давлат қўмитаси хабар бермоқда.

Маълум қилинишича, Олтиариқ тумани «Азимобод» МФЙда яшовчи фуқаро Х. А Азимобод ветеринария участкаси мудири Т.Қирғизбоевга телефон орқали мурожаат қилиб, 13 кун аввал бозордан 1 бош сигир сотиб олинганлигини билдириб, унинг иштаҳаси йўқлиги, нохуш ҳолатдалиги ҳақида хабар берган.

Участка мудири касалланган ҳайвонни ветеринария кўригидан ўтказганда қутуриш касаллигига хос клиник белгилар қайд этилган.

Ушбу қорамолдан олинган намуналар Вилоят ҳайвон касалликлари ташхиси ва озиқ-овқат маҳсулотлари хавфсизлиги давлат маркази вирусология бўлимида текширилганда қутуриш касаллиги тасдиқланиб, якуний текшириш хулосаси олиш учун 1 ой биопробага қўйилган.

Шунингдек, Олтиариқ тумани ветеринария ва чорвачиликни ривожлантириш бўлимига қутуриш касаллигига қарши комплекс ветеринария-санитария тадбирлари ўтказиш бўйича кўрсатма берилган.

Таъкидланишича, касаллик келиб чиқишига Азимобод МФЙ чўл ҳудудидаги ёввойи фауна мавжудлиги, яъни ёввойи ҳайвонлар ёки кемирувчилар борлиги сабаб бўлган.

Ушбу ҳудуд туман ветеринария ва чорвачиликни ривожлантириш бўлими томонидан алоҳида назоратга олиниб, ҳозирда аҳоли қарамоғидаги чорва ҳайвонлари клиник кўрикдан ўтказилиб, профилактик ветеринария-санитария тадбирлари ўтказилмоқда.

Келтирилишича, мазкур ҳудудда қутуриш касаллигига қарши 53 бош ит Биокан-Р вакцинаси билан эмланган, 12 бош дайди қаровсиз итлар Ободонлаштириш бошқармаси томонидан овланган.

Хонадон эгаси Х. А ва турмуш ўртоғи Х. Н касал ҳайвон билан контактда бўлганлиги учун туман Санитария эпидемиология осойишталиги ва жамоат саломатлиги маркази томонидан медицина муолажаси олиб, уларнинг умумий ҳолати яхшилиги маълум бўлган.

• Ветеринария