5 ноябрга ўтар кечаси Тошкент шаҳрида атмосфера ҳавоси сифати яхшиланиши прогноз қилинмоқда. Бу ҳақда Экология ахборот хизмати маълум қилди.

Прогнозларга кўра, кечки, тунги ва эрталабки соатларда ҳаво сифати халқаро ҳаво сифати индекси (АҚИ) бўйича асосан “ўртача”, айрим вақтларда эса “сезгир гуруҳлар учун носоғлом” даражада бўлиши мумкин. Миллий ҳаво сифати индекси бўйича эса кўрсаткич асосан “яшил”, қисқа муддат “сариқ” даражада бўлиши кутилмоқда.

Глобал об-ҳаво прогноз моделларига кўра, 5 ноябрга ўтар кечаси Тошкентда 2–6 миллиметр ёғингарчилик кузатилиши мумкин. Кутилаётган ёғингарчилик ҳаводаги PM2.5 ва PM10 майда заррачалари миқдорини камайтириб, ҳаво сифатининг яхшиланишига ёрдам бериши прогноз қилинмоқда.

Шунингдек, 5 ноябрь куни эрталаб халқаро АҚИ бўйича ҳаво сифати “ўртача”, миллий индекс бўйича эса асосан “яшил” даражада бўлиши кутилмоқда.

Айни пайтда Тошкент шаҳрида атмосфера ҳавоси сифати Махсус комиссия томонидан доимий мониторинг қилиб борилмоқда.