Ўзбекистонда “Жамиятдаги фаол фуқаро” мақомини олган шахсларга автокредит бошланғич бадалининг бир қисмини қоплаб бериш, контракт тўлови ва давлат хизматлари учун чегирмалар тақдим этиш режалаштирилмоқда. Бир йил давомида 208 нафар фуқарога ушбу мақом берилиши кўзда тутилган. Тегишли қарор лойиҳаси 20 ноябргача жамоатчилик муҳокамасига қўйилди.

Мазкур ташаббус Президентнинг 16 февралдаги фармони билан тасдиқланган 2026 йилга мўлжалланган ислоҳотлар дастуридаги “Жамиятдаги фаолликни рағбатлантириш” лойиҳаси доирасида амалга оширилади. Фуқаролар экологик лойиҳаларда қатнашиш, ёлғиз кексалар ва ногиронлиги бўлган шахсларга ёрдам бериш, низоли оилаларни яраштиришда жамоатчи медиатор сифатида иштирок этиш, ҳашарлар ҳамда ёшларни бепул ўқитиш каби мезонлар асосида баҳоланади.

Баҳолаш “бир соат — бир балл” тамойили асосида амалга оширилади. Ҳар бир йўналиш бўйича энг юқори балл 20 этиб белгиланган. Жамоатчи медиатор сифатида иштирок этишда низоли томонларнинг розилиги ва махфийлик таъминланиши талаб этилади.

Лойиҳага кўра, мақомга эга фуқароларга давлат хизматлари учун белгиланган йиғим ва тўловлардан 10 фоиз чегирма (давлат божи бундан мустасно), давлат олий таълим муассасаларидаги контракт тўловининг 5 фоизини қоплаш ҳамда автокредит бошланғич бадалининг 3 фоизини қоплаб бериш назарда тутилган. Автокредит бўйича компенсация базавий ҳисоблаш миқдорининг 20 бараваридан ошмайди.

“Жамиятдаги фаол фуқаро” мақоми бир йил давомида амал қилади. Ушбу мақомга эга бўлганлар “Фаол фуқаро” нишони билан тақдирланади, уларнинг яшаш хонадонига эса махсус белги ўрнатилади.

Мақом олиш учун фуқаролар ҳар ойнинг 15-санасига қадар Давлат хизматлари марказига мурожаат қилиши ёки Ягона интерактив давлат хизматлари портали орқали ариза юбориши мумкин. Аризага ижтимоий фаолликни тасдиқловчи фото, видео, мақола ва бошқа материаллар илова қилинади. Давлат хизмати бепул кўрсатилади.

Ҳозирда мазкур тартибни белгиловчи қарор лойиҳаси жамоатчилик муҳокамасида бўлиб, ундаги имтиёзлар ҳали лойиҳа босқичида.