IGN компанияси экспертларининг ҳисоб-китобларига кўра, 2022 йилги “Ҳар нарса, ҳар жойда” суперхити аллақачон 158 та мукофотга сазовор бўлди. Шундай қилиб, у тарихдаги энг номдор фильмдарни ортда қолдиришга эришди. Ушбу картина ҳатто 11 та йўналишда “Оскар” мукофоти учун ғолибликка даъвогарлик қилмоқда.

“Олтин глобус”, SAG, “Indie Spirits” ва бошқа шу каби нуфузли йирик танқидчи ташкилотлар томонидан таъсис этилган мукофотлар ушбу фильмга топширилди. Ҳисоблашда турли сайтларнинг рейтинглари ҳисобга олинмаган.

Аввалги рекорд “Узуклар ҳукмдори: Қиролнинг қайтиши” фильмига тегишли бўлиб, бир вақтнинг ўзида 101 та мукофотга лойиқ кўрилган. “Ҳар нарса, ҳар жойда” картинаси эса номинациялар сони бўйича ҳам, мукофотлар сони бўйича ҳам уни ортда қолдиришга эришди.

Нашрнинг эътироф этишича, “Қиролнинг қайтиши” фильми премьера қилингандан сўнг 20 йил давомида кино саноатида кўплаб янги мукофотлар пайдо бўлган. Бироқ, ушбу омил ҳисобга олинса ёки мукофотлар махсус схема бўйича ҳисобланса ҳам, Дан Кван ва Даниэль Шайнертнинг фантастик комедия йўналишидаги фильми Питер Жексон суратга олган “Узуклар ҳукмдори” франшизаси остидаги лойиҳани ҳар томонлама четлаб ўтади.

Қайд этиш мумкин, “IGN Entertainment” бу ўйинлар ва кўнгилочар видеолар ишлаб чиқаришга йўналтирилган етакчи интернет-медиа компанияларидан бири. IGN бутун дунё бўйлаб 288 миллиондан ортиқ ойлик фойдаланувчиларни қамраб олади ва 51 миллиондан ортиқ ижтимоий ва “YouTube” обуначилари унинг расмий саҳифаларини кузатиб боради.

“Ҳар нарса, ҳар жойда” 2022 йилда Дениэль Кван ва Даниэл Шайнерт (биргаликда “Даниэлс” номи билан танилган) томонидан яратилган абсурд комедия-драма йўналишидаги фильм. Сюжет маркази хитойлик иммигрант Эвелин Ванг ҳақида бўлиб, у қудратли мавжудот кўп оламни йўқ қилишига йўл қўймаслик учун ўзининг параллел коинот версиялари билан боғланиши кераклигини аниқлайди.

“The New York Times” ушбу лойиҳани сурреал комедия, илмий фантастика, жанг санъати ва анимация элементларидан иборат “жанр анархияси гирдоби” сифатида баҳолади.

• Oskar
• голливуд