Россия Федерациясининг таркибидаги Адигей Республикасида полиция синтетик гиёҳванд моддалар ишлаб чиқариш бўйича яширин лаборатория фаолиятини тўхтатди, деб хабар берди ТАСС. Ички ишлар вазирлигининг Адигей бўйича гиёҳванд моддаларни назорат қилиш бошқармаси ходимлари синтетик гиёҳванд моддаларни ишлаб чиқариш ва уларнинг прекурсорларини сақлашда гумон қилинган эр-хотинни қўлга олган. Улар республикага Краснодар ўлкасидан келган ва қишлоқдан шахсий уй сотиб олган. Эр-хотин ишлаб чиқариш тақиқланган моддаларни ўрмондаги яширин жойларга жойлаштирган.

“Текширув жараёнида умумий оғирлиги 6,5 кг.дан ортиқ бўлган 13 та полимер қопчаларда бўлган моддалар аниқланган. Гумонланувчиларнинг уйини кўздан кечириш чоғида умумий оғирлиги 33 кг.дан ортиқ прекурсорлар, синтетик келиб чиқиши тайёр дори воситалари аниқланган. Шунингдек, махсус жиҳозлар, нафас олиш ва қўлларни ҳимоя қилиш воситалари, реактивлар, ўлчаш асбоблари, полиэтилен пакетлар мусодара қилинган. Текширувлар натижаларига кўра, 12 кг.дан ортиқ мефедрон аниқланган. Эр-хотинга Россия Федерацияси Жиноят кодексининг 228-модда 5-қисми ва худди шу модданинг 2-қисми билан жиноят иши қўзғатилган”, деб маълумот берди Россия Ички ишлар вазирлиги расмий вакили Ирина Волк.

• Гиёҳвандлик