Ўзбекистон миллий терма жамоаси бош мураббийи Фабио Каннаваро Жаҳон чемпионати гуруҳ босқичидаги сўнгги учрашувдаги мағлубиятга ҳимоядаги хатолар сабаб бўлганини айтди. Бу ҳақда мураббий ўйиндан кейинги матбуот анжуманида маълум қилди. «Биринчи бўлимда жуда кўп энергия сарфладик. Шу кунгача жисмоний тайёргарлигимиз яхши даражада эди ва бугун ҳам бу борада яхши ҳаракат қилдик. Рақибимиз ҳам жисмонан яхши тайёрланган жамоа эканини билардик. Учрашув олдидан тўпни назорат қилмасак, қийин бўлишини яхши тушунган эдик. Иккинчи бўлимда эса хатоларга йўл қўйдик ва шу сабабли голлар ўтказиб юбордик», — деди Каннаваро.

Мураббийнинг таъкидлашича, Ўзбекистон биринчи бўлимни яхши ўтказган ва бир нечта хавфли вазиятлар яратган. «Биринчи таймни жуда яхши бошладик, кўплаб имкониятларга эга бўлдик. Аммо иккинчи бўлимда хатолар қила бошладик ва бу бизга қимматга тушди», — деди у. Италиялик мутахассис ушбу мусобақа жамоа учун катта тажриба бўлганини ҳам қайд этди.

«Бу мусобақа мен учун ҳам, футболчилар учун ҳам катта тажриба бўлди. Ўйлайманки, бу келажакда бизга катта мотиватсия беради», — деди бош мураббий. Шунингдек, Каннаваро футболчилар билан доимий мулоқотда бўлганини ва гуруҳ босқичида кучли рақибларга қарши майдонга тушишларини олдиндан билганини таъкидлади. «Албатта, футболчилар билан жуда кўп мулоқот қилдим.

Гуруҳимизда кучли жамоаларга қарши ўйнашимизни билардик. Лекин ушбу натижадан афсусдамиз. Ҳа, биз хатолар қилдик. Бироқ мен футболчилардан умуман шикоят қилмоқчи эмасман. Улар қўлидан келган барча ишни қилди ва мен улардан фахрланаман», — деди у. Эслатиб ўтамиз, Ўзбекистон миллий терма жамоаси Жаҳон чемпионатининг 3-турида Конго Демократик Республикасига 1:3 ҳисобида мағлубиятга учради.