АҚШ ҳукуматининг расмий маълумотларига кўра, 2026 йилнинг дастлабки беш ойи давомида Иммигратсия ва божхона назорати (ИCЕ) тасарруфидаги мигрантларни сақлаш марказларида 18 киши вафот этган. Бу ҳақда БМТнинг Инсон ҳуқуқлари бўйича олий комиссари Фолкер Тюрк маълум қилди. Унинг айтишича, июнь ойида яна бир ўлим ҳолати қайд этилган.

Таққослаш учун, 2025 йил давомида бундай ҳолатлар сони 33 тани, 2024 йилда эса 11 тани ташкил этган. Фолкер Тюрк ҳибсхоналардаги ўлим ҳолатлари бўйича шаффофлик ва аниқликнинг етишмаслиги айбдорларни жавобгарликка тортиш имкониятларига салбий таъсир кўрсатаётганини таъкидлади. «Мен ИCЕ ҳибсхоналаридаги барча ўлим ҳолатлари бўйича тезкор, мустақил, холис ва самарали тергов ўтказишга чақираман.

Қонунни бузган шахслар жавобгарликка тортилиши, ҳалок бўлганларнинг оилалари эса ҳақиқатни билиш ва адолатга эришиш ҳуқуқига эга бўлиши керак», — деди у. Маълум қилинишича, айни пайтда ИCЕ марказларида 60 мингдан ортиқ киши сақланмоқда. 2025 йил бошида бу кўрсаткич қарийб 40 минг нафарни ташкил этган.

Расмийлар 2026 йил охирига қадар марказлар сиғимини 90 минг кишига етказишни режалаштирмоқда. Баёнотда таъкидланишича, ушбу марказларда болали оилалар ва оғир касалликларга чалинган шахслар ҳам сақланмоқда. Айрим ҳолларда улар зарур тиббий хизмат ва озиқ-овқат билан тўлиқ таъминланмаётгани айтилган. Шунингдек, муассасалардаги тиқилинч шароит юқумли касалликлар тарқалиши хавфини оширмоқда. 2026 йилда расман қайд этилган ўлим ҳолатларининг бештаси ўз жонига қасд қилиш сифатида таснифланган.

Фолкер Тюрк бир кишилик камераларда сақлаш амалиётидан ҳам хавотир билдириб, бундай чора фақат истисно ҳолларда қўлланилиши лозимлигини таъкидлади.

Олий комиссар мигрантларни ҳибсга олиш фақат охирги чора сифатида қўлланилиши, болалар эса иммигратсия марказларига жойлаштирилмаслиги кераклигини қайд этди. Шунингдек, у мигрантлар ва қочқинларни камситиш ҳамда уларни жиноятчи сифатида кўрсатиш уринишларини кескин қоралади.