Неча йиллардан буён одамлар компьютер ёнига кактус қўйиш борасида баҳслашиб келишади. Баъзилар унинг сеҳрли кучига ишониш керак эмас, деб ҳисоблашса, айримлар эса бунга кўр-кўрона ишониб, иш столи устини майда кактусларга тўлдириб ташлаган.
Нима бўлган тақдирда ҳам ҳозир бу ўсимлик компьютерлар билан бир суръатда ҳар бир уйга кириб борган. Айниқса, аёллар журналлари сирли нурланиш ва унинг салбий оқибатлари хусусида ёза бошлагач, интернетда ўтирадиган ҳар бир аёл монитори ёнига кактус қўядиган бўлди. Етмаганига турмуш ўртоғи ва севган инсонига ҳам кактус совға қилди.
Игнабарглилар радиацияни ўзига ютадими?
Агар биология энциклопедиясига назар ташлайдиган бўлсак, игнабарглилар сувни ўзида сақлаб туриш хусусиятига эга. Бироқ радиация, электромагнит импульслари ёки зарарли нурланишни ютиши хусусида умуман гап йўқ.
Ҳозирги замон компьютерларидан саломатликка путур етказадиган зарарли нурлар ажралиб чиқиши ҳам расман тасдиқланмаган. Тўғри, бир вақтлар ўзидан рентген нурларига яқин нур таратадиган эски мониторлар бўларди. Бироқ улар аллақачон истеъмолдан чиқарилган. Суюқ кристаллардан ясалган мониторлар эса соғлиқ учун хавф туғдирмайди.
Албатта, инсонларнинг ўзи ва яқинларини радиациядан асрашга интилишини тушуниш мумкин. Бироқ кактуслар бу ишни уддалай олмайди. Акс ҳолда Чернобил шаҳрини кактус босиб кетган бўларди.
Бироқ кактуснинг айрим фойдали хусусиятларини ҳам инкор эта олмаймиз.
Куч-қувватни оширади
Кактуслар худди бошқа ўсимликлар каби ҳаводаги зарарли моддаларни ўзига сингдириш хусусиятига эга. Бундан ташқари, у кислород ажратиб, ҳавони тозалайди. Компьютер қўйилган хонанинг тоза кислородга тўйиниши ва вақтида намланиши иш қобилиятини ошириб, ишчиларни тетик қилади.
Бу ўсимлик, айниқса, мактаб ўқувчилари, талабалар ва ақлий меҳнат билан шуғулланувчиларга асқатади. Унинг кучли энергетикаси онгни фаоллаштиради, концентрацияни оширади, мантиқий фикрлашни ривожлантиради. Мазкур ўсимлик фикрларингизни тартибга солади ва сиз қийин юмушларни ҳам бир зумда бажарасиз. Бундан ташқари, у бош оғриғини бартараф этиш хусусиятига ҳам эга.
Эстетик хусусияти
Кактусни компьютер ёнига гўзаллик учун ҳам қўйиш мумкин. Ҳатто компьютер тўлқини остида у янаям гуркираб ўсади, деган тахминлар ҳам мавжуд. Бундан ташқари, кактуслар беор ўсимлик ҳисобланади, уларга ортиқча эътибор керак эмас. Доим бир хилда туради, бирор ерга кетсангиз ҳам тезда сўлиб қолмайди. Кактусларнинг айримлари жуда чиройли гуллайди.
Кўз нурини ҳимоя қилади
Олимлар кактуснинг кўриш қобилияти сусайишининг олдини олишига шубҳа билан қарайдилар. Улар ҳавони қанчалик тозаламасин, мониторга тикилавериш кўриш қобилиятини сусайтиради. Агар кўзни вақтида дам олдирмасангиз ва хона етарлича ёритилмаган бўлса, бу ҳолат янаям кучаяверади.
Кактуснинг кўзга фойдасини қуйидагича изоҳлаш мумкин: ходим гоҳида унга тикилиб, бироз чалғийди, кўзлари ҳам дам олади. Бу ўсимликни шу нуқтаи назардан ҳам тинчлантириш қобилиятига эга, деб ҳисоблаш мумкин. Монитор ҳамда ўсимлик ўртасида бориб келган кўзларда қон айланиши яхшиланади, кўз мушаклари мустаҳкамланади, чарчоғи кетади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!