Наманган вилоятининг Поп туманида ер майдонини расмийлаштириб беришни ваъда қилган шахслар қўлга олинди. Бу ҳақда Бош прокуратура ҳузуридаги Департамент хабар қилди. Маълум қилинишича, Департаментнинг Поп тумани бўлими ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбир давомида фуқаролар У.А. ва М.Б. (муқаддам судланган) ўзаро тил бириктирган ҳолда қўлга олинган.

Терговга қадар текширув материалларига кўра, улар Кадастрлар палатасида ишловчи танишлари орқали «Қўшминор» маҳалла фуқаролар йиғини ҳудудида жойлашган фермер хўжалиги балансидаги 50 сотих ер майдонини 381 минг АҚШ доллари эвазига фуқаро А.С. номига нотурар жой сифатида расмийлаштириб беришни ваъда қилган. Тезкор тадбир жараёнида гумонланувчилар ушбу хизмат эвазига 5 минг АҚШ долларини олган вақтда ушланган.

Тадбирнинг давомида Кадастрлар палатаси Поп тумани бўлимининг собиқ бошлиғи С.А. ҳам 1,5 минг АҚШ доллари ва 6 миллион сўмни олган вақтида ашёвий далиллар билан қўлга олинган. Мазкур ҳолат юзасидан Жиноят кодексининг тегишли моддалари билан жиноят иши қўзғатилган бўлиб, айни пайтда тергов ҳаракатлари олиб борилмоқда.