Исроил ҳукуматининг расмий саҳифасида ёзилишича, Исроил Бош вазири Бинямин Нетаняху кеча, 20 июль куни “яроқсиз ёки бузилган” озиқ-овқатдан заҳарланди ва ичак яллиғланиши билан касалланган.

Маълум қилинишича, 20 июлга ўтар кечаси Нетаняху ўзини ёмон ҳис қила бошлаган. Ҳозирда унинг аҳволи яхши деб баҳоланмоқда. У ҳозирги пайтда сувсизланиш сабабли томир орқали даволанмоқда (инфузион терапия). Яқин уч кун давомида Бош вазир ишини уйдан туриб олиб боради.

2024 йилнинг декабрь ойида Тел-Авив округ судида Нетаняхуга нисбатан илгари очилган ишлар бўйича тингловлар бошланган эди. Суд томонидан белгиланган тартибга кўра, Нетаняху ҳафтасига уч марта, ҳар куни олти соатдан гувоҳлик бериши керак эди. Аммо бу жадвал турли сабабларга кўра кўп бор бузилган ва касаллик сабаб ҳам Нетаняху энди 21-22 июль кунлари бўлиши керак бўлган суд мажлисларида иштирок этолмайди.

Нетаняхуга нисбатан бир нечта жиноий иш очилган. Энг оғир айблов – пора олиш. Шунингдек, Нетаняхуга нисбатан фирибгарлик ва жамоат ишончини суиистеъмол қилиш айбловлари ҳам илгари сурилган.

Маълумот учун, 2023 йилда Исроил Бош вазирида юрак стимулятори имплантацияси бўйича жарроҳлик амалиёти ўтказилган. Операция ўтказишга юрак ритмини кузатиш учун аввал ўрнатилган қурилма юрак стимулятори имплантацияси зарурлигини билдирганидан кейин қарор қилинган.

• Бош вазир
• Isroil
• Заҳарланиш