Жиззах вилояти Пахтакор туманида ўн туп дарахт кесган фуқаро 2 йилга қамалди. Бу ҳақда “Миллар” дастурида хабар берилди.

Пахтакор туманидаги фермер хўжалиги ҳудудида 10 туп дарахт номаълум шахс томонидан кесиб кетилди. Тезкор суриштирув ҳаракатларидан кейин маълум бўлишича, бу ишни 1976 йилда туғилган фуқаро содир этган. У бу ишни содир қилган вақтида аввалги қилган жинояти учун жазони ўтаётган бўлган.

Мазкур ҳолат бўйича иш Жиноят ишлари бўйича Пахтакор туман судида кўриб чиқилди. Судланувчи Жиноят кодексининг 198-моддаси иккинчи қисмида назарда тутилган жиноятни содир этганликда айбли деб топилиб, унга узил-кесил 2 йил-у 2 ой муддатга озодликдан маҳрум қилиш жазоси тайинланган.

Шунингдек, суд ҳукмига кўра, судланувчидан Экология, атроф-муҳитни муҳофаза қилиш ва иқлим ўзгариши вазирлиги Жиззах вилояти бошқармаси фойдасига 253 миллион 300 минг сўм миқдорида моддий зарар ундириш белгиланган.

• Jazo
• Жиззах
• Суд
• daraxt