Кеча, 17 сентябрь куни Қирғизистон Президенти Садир Жапаров “Жалолобод вилоятидаги Жалолобод шаҳрини Манас деб ўзгартириш тўғрисида”ги қонунни имзолади. Бу ҳақда Қирғизистон раҳбарининг матбуот хизмати хабар берди.

Маълум қилинишича, шаҳар номини ўзгартириш тўғрисидаги қонунни мамлакат парламенти шу йилнинг 10 сентябрь куни қабул қилган.

“Қонуннинг мақсади – миллий мафкурани мустаҳкамлаш, Жалолобод шаҳрига буюк Манас – қирғиз халқининг турли босқинлардан ҳимоячиси, халқ қаҳрамонининг номини бериш”, – дейилади хабарда.

10 сентябрь куни Қирғизистон парламенти мажлисида депутат Мирлан Самихўжа “Манас” қирғизлар учун бош эпос, буюк мерос ва руҳ эканини таъкидлаган.

“Шу сабабли унинг номини оладиган шаҳар зиммасига жуда катта масъулият тушади – етти, ўн баравар кўп. Аҳоли бу номга муносиб бўлиши керак. Шунинг учун интернетда бундай нарсалар бўлмаслиги лозим: Манаснинг фоҳишалари, Манаснинг коррупсионерлари, Манаснинг зўравонлари. Бундай сўзлар эҳтиёткорлик билан ишлатилиши керак, қонунни бузиб, бундай ёмон ишларни қиладиганлар у ерда умуман бўлмаслиги керак. Шаҳар аҳолиси ибрат кўрсатиши ва Манаснинг обрўсини ошириши лозим”, – деган депутат.

Маълумот учун, Жалолобод шаҳри 1877 йил октябрда расман аҳоли пункти сифатида ташкил этилган бўлиб, бугунги кунда шаҳар аҳолисининг 30 фоизга яқини ўзбеклардан иборат.

• Japarov
• Қирғизистон
• Қонун