Швециялик тадқиқотчи алгоритмдан ўзи ҳақида академик мақола ёзишни сўради, у ҳозир илмий журналда чоп этиш учун кўриб чиқилмоқда.

Нима содир бўлди?

“GPT-3 OpenAI” инсонга ўхшаш матнларни яратиш учун катта ҳажмдаги маълумотларни таҳлил қила оладиган табиий тилни қайта ишлаш алгоритми ҳисобланади. Модель ишлаб чиқувчилари Грег Брокман, Мира Мурати ва Питер Велиндер ўзлари яратган АПИ (Амалий дастурлаш интерфейси) “инглиз тилидаги ҳар қандай муаммони ҳал қила олади” деб даъво қилмоқда.

Швециянинг Гётеборг университетининг тадқиқотчиси Алмира Османович Тунстрем GPT-3 ўзи ҳақида қанчалик яхши ёзиши мумкинлигини аниқлаш мақсадида тажриба ўтказишга қарор қилди. Тунстрем матн генераторига оддий буйруқни киритди: “GPT-3 ҳақида 500 сўздан иборат академик мақола ёзинг ва матнга илмий ҳаволалар ҳамда иқтибослар қўшинг”.

Алгоритм матнни академик тилда ёзишни бошлади ва ундаги ҳаволалар керакли жойларда ва керакли контекстда берилди. Тунстремнинг таъкидлашича, бу жуда яхши илмий нашрда чоп этиш мумкин бўлган академик мақола эди.

“GPT-3 ўзи ҳақида энг кам одам иштироки билан академик мақола ёза оладими?” сарлавҳали мақолани ёзиш учун алгоритмга атиги икки соат керак бўлди.

Матн ҳозирда француз препринт серверида жойлашган ва нашрда чоп этиш учун кўриб чиқилмоқда.

Прецедент кўплаб ҳуқуқий қийинчиликларни келтириб чиқарди. Масалан, мақола чоп этиш учун муаллифнинг розилиги талаб қилинади. Тунстрем алгоритмдан манфаатлар тўқнашуви бор-йўқлигини ва у ижобий жавоб олган илмий нашрнинг биринчи сунъий интеллект муаллифи бўлишга тайёрми ёки йўқлигини сўради.

Бу нима дегани?

Нейрон тармоқлари, хусусан, GPT-3 кўплаб соҳаларда одамлар билан тенг ишлайди: алгоритм журналистик мақолалар ва эслатмаларни яратади. Бироқ нейрон тармоқ портфелида ҳали ўзи ҳақида илмий мақола мавжуд эмас.

Агар қўлёзма кўриб чиқишдан муваффаққиятли ўтиб, илмий журналда нашр этилса, тадқиқотчилар бир қатор янги ахлоқий ва ҳуқуқий муаммоларга дуч келишади. Таҳрирловчилар барча муаллифлардан матн сунъий интелект ёрдамисиз ёзилганлигини исботлашни талаб қиладими? Нейрон тармоқни ҳаммуаллиф сифатида кўрсатишлари керакми? Матн таҳрир қилиш мумкинми ва GPT-3 уни қандай таҳрирлайди?

Мақоланинг нашр этилиши, агар у рўй берса, илмий жамоатчилик учун нимани англатиши ҳозирча номаълум. Аммо, эҳтимол, академик нашриётлар сунъий интеллект томонидан ёзилган мақолаларни нашр этишга мослашишлари керак. Тадқиқотчилар ишининг қиймати сунъий интеллект келажакда қандай роль ўйнашига қараб ўзгаради.

• Olimlar
• Швеция
• sun’iy intellekt
• технология