Узоқ вақтдан бери оилада иккинчи фарзандлар исёнкорроқ бўлади деган қараш мавжуд. Тадқиқотчилар ушбу назарияни тасдиқловчи илмий далилларни эълон қилди.

МИТ иқтисодчиси Жозеф Дойл томонидан ўтказилган тадқиқотга кўра, иккинчи туғилган болалар ҳақиқатан ҳам исёнкор хатти-ҳаракатларни намоён этишга мойил. Бу, айниқса, қиз болаларга нисбатан ўғил болаларда икки баравар кўпроқ кузатилади.

"Оилада иккинчи туғилган болаларнинг қамоққа тушишлари, мактабда ўқишни тўхтатиб қўйишлари ва жиноятга қўл уришлари эҳтимоли жуда катта", дейди у.

Аммо бу ёмон хулқ-атвор аслида ака-укаларнинг айби билан бўлиши ҳам мумкин, чунки кичик ёшдагилар ўзларининг хатти-ҳаракатларини катталарга қараб шакллантиради.

Тўнгич фарзанд ота-онасининг хулқ-атворига қараб, иккинчи ва ундан кейин туғилган болалар эса акаси ёки опасининг характеридан намуна олишади.

Тадқиқот учун Дойл Дания ва Флорида штатидаги оилалар ҳақидаги маълумотларни таҳлил қилди. Географик ҳудуд ва муҳитда катта фарқлар бўлишига қарамай, натижалар деярли бир хил бўлган.

Иккинчи фарзандларда ўқишга қизиқиш паст, аммо қамоққа тушиш хавфи 20-40 фоизга юқори.

Дойлнинг қўшимча қилишича, аксарият ота-оналар биринчи туғилган чақалоқларига кўпроқ вақт сарфлайди ва бошқача муносабатда бўлишади. Шу сабаб иккинчи фарзандларда исёнкорлик юқори бўлиши мумкин.

• Болалар
• Oila
• Tarbiya