Ўзбекистонга саёҳатларга қизиқиш 54 фоизга ошди — Expedia Group маълумотлари

Ўзбекистонга саёҳатларга бўлган глобал қизиқиш ўсишда давом этмоқда. Халқаро туризм компанияси Expedia Group маълумотларига кўра, июнь ойида мамлакатга саёҳатлар билан боғлиқ қидирувлар сони ўтган йилнинг шу даврига нисбатан 54 фоизга ошган. Шу билан бирга, расмийлаштирилган бронлар сони ҳам кўпайган.

Ўзбекистон Туризм қўмитаси маълумотига кўра, жорий йилнинг июнь ойида Expedia Group платформаси орқали Ўзбекистонга саёҳатни бронь қилган сайёҳлар сони ўтган йилнинг шу даврига нисбатан 45,6 фоизга ошган. Харид қилинган авиачипталар сони эса 23 фоизга кўпайган.

Expedia Group платформалари фойдаланувчилари орасида Ўзбекистон учун асосий хорижий бозорлар АҚШ, Япония, Буюк Британия, Корея Республикаси, Германия ва Франция бўлиб қолмоқда. Талабнинг энг юқори ўсиш суръатлари АҚШ ва Японияда қайд этилган.

Мамлакат ичидаги энг оммабоп йўналишлар орасида Тошкент, Самарқанд ва Бухоро етакчиликни сақлаб қолмоқда. Шу билан бирга, Хивага бўлган қизиқиш ҳам ортиб бормоқда.

Дастлабки бронлар бўйича маълумотлар ҳам яқин ойларда юқори талаб сақланиб қолишини кўрсатмоқда. Expedia Group маълумотларига кўра, тасдиқланган барча бронларнинг 82,9 фоизи 2026 йил июль–сентабр ойларига режалаштирилган саёҳатларга тўғри келади.