Озарбайжоннинг Минвал нашри сайтида Россиянинг Калининград шаҳри Кёнигсберг деб номланган мақолалар пайдо бўлди. Масалан, янгиликлардан бири “Россия Кёнигсбергда С-400 ва зарба берувчи тизимларни жойлаштирди” сарлавҳаси билан чоп этилди. Бошқа мақолаларда эса Оренбург шаҳри Ўринбор, Волга дарёси эса Итил деб аталган.

Минвал Россиянинг ТАСС ахборот агентлиги томонидан Озарбайжоннинг Қорабоғдаги Хонкенди шаҳрида рассом Иван Айвазовский ҳайкалининг бузилиши ҳақида чиққан хабарига жавоб тариқасида шундай ёзди. ТАСС ўз хабарида совет давридаги топонимлар — Қорабоғ ўрнига Тоғли Қорабоғ ва Ханкенди ўрнига Степанакерт номларини ишлатган.

Озарбайжон Ташқи ишлар вазирлиги норозилик билдириб, ТАССъдан узр сўрашни талаб қилди. Вазирлик баёнотига кўра, давлат ахборот агентлиги томонидан “Степанакерт” номининг қўлланилиши мамлакат ҳудудий яхлитлигига нисбатан ҳурматсизлик ва ҳақорат сифатида қабул қилинади. Шунингдек, Ташқи ишлар вазирлиги ўз баёнотида, ўзаро жавоб чораси сифатида, Озарбайжон Россиядаги айрим топонимларни ўзининг тарихий номлари билан аташидан огоҳлантирди.

ТАСС ахборот агентлиги Озарбайжоннинг танқидига жавобан хабар матнига ўзгартишлар киритди.

• Баёнот
• Озарбайжон
• Россия
• Tashqi ishlar vazirligi