Республика ОИТСга қарши кураш маркази директори ўринбосари Гулифор Нормуратова тизимда 2022 йилда олиб борилган ишлар ҳамда жорий йилда режалаштирилган чора-тадбирлар ҳақида маълумот берди.

Унга кўра, одамнинг иммунитет танқислиги вируси (ОИВ) касаллиги билан бугунги кунда Ўзбекистонда 45 мингдан ортиқ шахслар яшаб келмоқда.

Келтирилишича, 63 та туманлараро ОИВ диагностик лабораториялар ОИТСга қарши курашиш марказлари тасарруфига ўтказилиб, зарур тиббий ускуналар билан жиҳозланди, ҳар бир вилоят юқумли касалликлари негизида 5 тадан 40 тагача ОИВ беморларга хизмат кўрсатадиган ўринлар ташкил этилган.

Беморларга қулайликлар яратиш мақсадида 260 та юқумли касаллик хоналари мутахассислари қайта ўқитилиб, тайёрланган ва ОИТСга чалинган беморларни даволаш ишларига жалб этилган.

ОИВ инфекциясига текширувлар сони 700 мингдан 3,5 миллионга ёки 5 баробарга ортган. Ҳукумат томонидан дори воситаларини молиялаштириш 80%ни ташкил этиб, Халқаро ташкилотлар томонидан 20% ҳолатларда дориларни Ўзбекистонга олиб кирилиши ҳамда касаллик аниқланиши биланоқ, барча беморларга дори воситаларини бериб бориш йўлга қўйилган.

Онадан болага ОИВ инфекциясини юқишини олдини олиш мақсадида ҳар йили 600 нафар шу касалликка чалинган болаларга қуруқ сут маҳсулотлари олиб берилмоқда.

18 ёшгача бўлган ОИВ инфекциясига чалинган болаларга ижтимоий нафақалар бериб борилиши йўлга қўйилган.

Шунингдек, қўшимча қилинишича, БМТ Бош Ассамблеяси томонидан 2030 йилга бориб ОИВ эпидемиясига барҳам бериш учун «95-95-95» стратегиясига асосан ОИВ инфекцияли шахсларнинг 95 фоизи ўз мақомини билишлари, 95 фоизи махсус даволаш курслари билан қамраб олинишлари ҳамда 95 фоизи қонида вирус юкламаси аниқланмайдиган даражага тушишига эришилади.

Жорий йилнинг 20 январида қабул қилинган «Аҳоли орасида ОИВ инфекцияси тарқалишига қарши курашиш самарадорлигини оширишга доир 2023–2027 йилларга мўлжалланган комплекс чора-тадбирлар дастури»ни амалга ошириш мақсадида 120 млрд. сўм ва 54 млн. доллар йўналтирилади.

• Касаллик
• ОИТС