Зеленский Илон Маскни “Озодлик” ордени билан мукофотлади

Америкалик тадбиркор Илон Маск Украинанинг “Озодлик” ордени – мамлакатдаги энг олий давлат мукофотларидан бири билан тақдирланди. Президент Владимир Зеленский тегишли фармонни имзолади.

Фармонда айтилишича, SpaceX ва Tesla компаниялари раҳбари “инсонлар ҳаёти ва озодлигини ҳимоя қилишдаги муҳим хизматлари, Украина ва Америка Қўшма Штатлари халқлари ўртасидаги муносабатларни ривожлантирганлиги учун” мукофотланган.

Маълумот учун, “Озодлик” ордени – Украинада ажнабийлар ҳам олиши мумкин бўлган энг олий мукофот. Мамлакат фуқаролари учун эса “Украина Қаҳрамони” унвони энг олий мукофот ҳисобланади. Украинанинг “Интерфакс” нашри қайд этишича, “Озодлик” ордени билан тақдирланган хорижликлар орасида Германиянинг собиқ канцлери Ангела Меркел, Франция Президенти Эммануэл Макрон, Италия Бош вазири Жоржия Мелони, Полша Президенти Анжей Дуда ва бошқалар бор.

Қайд этиш жоиз, SpaceX компаниясининг Starlink сунъий йўлдош тармоғидан Украина ҳарбийлари жанговар ҳаракатларда кенг фойдаланмоқда.