31°
Кечаси 18°
Ўзбекистоннинг барча 6 та жамоаси шахмат Олимпиадасини ғалаба билан бошлади.
Ўзбекистон Самарқанддаги шахмат олимпиадасида олтита жамоа билан иштирок этмоқда. 1-турда эркакларнинг учта жамоаси Ямайка, Мали ва Афғонистонни, аёллар жамоалари эса Тринидад ва Тобаго, Того ҳамда Танзанияни мағлуб этди.
16 сентябрь куни Самарқандда 46-Бутунжаҳон шахмат Олимпиадаси 1-тур баҳслари ўтказилди. Ўзбекистон мусобақа мезбони сифатида эркаклар ва аёллар турнирида учтадан жамоа билан қатнашмоқда.
Биринчи турда эркакларнинг асосий жамоаси Ямайкани 4:0 ҳисобида енгди. Биринчи тахтада Нодирбек Абдусатторов, кейинги тахталарда Нодирбек Ёқуббоев, Шамсиддин Воҳидов ва Муҳиддин Мадаминов ғалабага эришди. Ўзбекистон терма жамоаси етакчиси Жавоҳир Синдаров дастлабки турда дам олди.
Ўзбекистон-2 эркаклар жамоаси Афғонистонни 3:1 ҳисобида мағлуб этди. Ўзбекистон-3 мусобақани Мали устидан қозонилган 3,5:0,5 ҳисобидаги ғалаба билан бошлади.
Биринчи рақамда экилган ва асосий фаворит саналаётган АҚШ терма жамоаси Ироқ билан куч синашди ва 3,5:0,5 ҳисобида ғалаба қозонди. Амалдаги Олимпиада чемпиони, иккинчи рақамда экилган Ҳиндистон биринчи турда Таиланд устидан 3:1 ҳисобида ғалаба қозонди.
Ўзбекистоннинг асосий аёллар терма жамоаси Тринидад ва Тобагони 4:0 ҳисобида мағлубиятга учратди. Биринчи тахтада Гулруҳбегим Тоҳиржонова, кейинги тахталарда Нилуфархон Имомқўзиева, Гулдона Каримова ва Умида Омонова рақибларидан устун келди.
Ўзбекистон-2 терма жамоаси Того устидан 3:1 ҳисобида ғалаба қозонди. Ўзбекистон-3 эса Танзанияни йирик 4:0 ҳисобида мағлуб этди.
46-Бутунжаҳон шахмат олимпиадаси Самарқандда 27 сентябргача давом этади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
