Эронда Сепеҳран Аирлинес авиакомпаниясининг Боэинг 737 самолёти ҳавога кўтарилганидан кўп ўтмай шиналаридан бири ёрилиб, фавқулодда қўнишга мажбур бўлди. Ҳодиса 15-сентябрь куни содир бўлган.

Самолёт Машҳаддан Кирмоншоҳга учаётган бўлган. Дастлабки маълумотларга кўра, ҳавога кўтарилиш вақтида шиналардан бири ёрилган. Кейинчалик двигателлардан бирида ҳам носозлик юзага келгани хабар қилинган.

Учувчи фавқулодда ҳолат эълон қилиб, самолётни Машҳад халқаро аэропортига қайтарган. Учоқ муваффақиятли қўнган ва йўловчилар ҳамда экипаж аъзоларидан ҳеч ким жабрланмаган.

Ижтимоий тармоқларда тарқалган видеоларда самолёт кучли тебранаётгани, салоннинг айрим қисмлари ажралиб тушгани ва юк жавонларидаги буюмлар сочилиб кетгани кўринади.

Ҳодисадан сўнг аэропортдаги учиш-қўниш йўлагининг бири вақтинча ёпилган. Йўловчилар бошқа самолёт орқали Кирмоншоҳга етказилган.

Носозликнинг аниқ сабаби ҳозирча маълум қилинмаган.