Президентнинг 20 июндаги “Маъмурий ислоҳотлар доирасида соғлиқни сақлаш соҳасида давлат бошқарувини самарали ташкил қилиш чора-тадбирлари тўғрисида”ги қарори билан Ҳамширалар академияси ташкил этилади.

Қарорга кўра, ушбу академия 2023/2024 ўқув йилидан Чилонзор Абу Али ибн Сино номидаги Жамоат саломатлиги техникуми негизида ташкил этилади. Шу ўқув йилидан тиббиёт коллежлари негизида Абу Али ибн Сино номидаги Жамоат саломатлиги техникумлари ҳам ташкил этилади.

Қуйидагилар жорий этилади:

• тиббиёт ОТМда ўқиш муддати 4 йиллик “олий малакали ҳамшира” бакалавриат таълим йўналиши бўйича мутахассисларни тайёрлаш;
• техникумларнинг таклифлари асосида қабул параметрлари ҳамда қўшимча равишда табақалаштирилган тўлов-контракт асосида ўқишга қабул қилиш тартиби;
• тиббиёт йўналишидаги давлат ОТМ талабаларининг билимларини 2 босқичли (фундаментал ва клиник-амалий кўникмалар) баҳолаш ва уларнинг малакасини тасдиқлаш миллий тизими;
• тиббиёт ходимларининг малакасини оширишга қаратилган узлуксиз касбий таълим портали.

Шунингдек, қуйидаги марказлар ташкил этилади:

• Фармацевтика маҳсулотлари хавфсизлиги маркази;
• Тиббиёт ва фармацевтика ходимларининг малакасини баҳолаш маркази;
• Тиббиёт ташкилотларини лицензиялаш ва аккредитациялаш маркази.

Давлат ва нодавлат тиббиёт ташкилотларига малака ошириш курсларини жорий этиш ҳуқуқи берилади. Тиббиёт ва фармацевтика ходимларини узлуксиз касбий ривожлантириш, уларнинг малакасини ошириш жараёнлари тўлиқ рақамлаштирилади.

2023 йил якунигача барча нодавлат тиббиёт ташкилотлари Соғлиқни сақлаш вазирлигининг махсус ахборот тизимига уланади. Нодавлат тиббиёт ташкилотининг ходимлари, тиббий техникаси, хизмат турлари, тиббий статистика ва бошқа ҳисоботлари мониторинги юритилади. Тиббий фаолиятни назорат қилишда “хавфни таҳлил қилиш” тизими йўлга қўйилади.

• Fanlar akademiyasi
• hamshira