АҚШ Мудофаа вазирлиги (Пентагон) Миллий хавфсизлик вазирлигига Мексика чегарасида қўлланиши мумкин бўлган иссиқлик нури қуролини етти ой давомида синовдан ўтказишга рухсат берди. Бу ҳақда Meduza хабар берди.

Active Denial System деб номланган қурилма кўзга кўринмас электромагнит тўлқинлар тарқатади. Улар инсон терисида кучли қизиш ва куйиш ҳиссини юзага келтириб, одамни нурланиш ҳудудидан чиқишга мажбур қилади.

Маълумотларга кўра, қурилманинг самарали таъсир масофаси тахминан 1 000 метрни ташкил этади. Нурнинг таъсир доирасидан чиққач, кучли қизиш ҳисси тўхтайди, бироқ теридаги ачишиш ва сезувчанлик яна 10–15 дақиқа давом этиши мумкин.

Миллий хавфсизлик вазирлиги етти ойлик синов давомида қурилмани чегарада қўллаш тактикаларини ишлаб чиқади. Уни қаерда ва қандай шароитда синаш режалаштирилгани ҳозирча очиқланмаган.

Мазкур қуролдан мигрантларга қарши фойдаланиш имконияти аввал ҳам муҳокама қилинган. Бироқ унинг инсон саломатлигига таъсири ва қўлланишининг ҳуқуқий жиҳатлари юзасидан саволлар мавжуд.