Ўзбекистонда ўртача ойлик пенсия миқдори сўнгги 10 йил ичида 3,3 бараварга ошган. Миллий статистика қўмитаси маълумотларига кўра, 2025-йилда мамлакатда ўртача ойлик пенсия 1 миллион 649,2 минг сўмни ташкил этган.

Бу кўрсаткич 2016-йилдаги 494,2 минг сўмга нисбатан 3,3 баравар юқори.

Ўртача ойлик пенсия миқдори йиллар кесимида:

2016-йил — 494,2 минг сўм;

2017-йил — 556,8 минг сўм;

2018-йил — 640,5 минг сўм;

2019-йил — 733,2 минг сўм;

2020-йил — 848,5 минг сўм;

2021-йил — 963,6 минг сўм;

2022-йил — 1 миллион 80,8 минг сўм;

2023-йил — 1 миллион 234,5 минг сўм;

2024-йил — 1 миллион 495,6 минг сўм;

2025-йил — 1 миллион 649,2 минг сўм.

Иқтисодиёт ва молия вазирлиги томонидан тайёрланган фискал стратегияда ўртача пенсия миқдори келгуси йилларда ҳам босқичма-босқич ошиб бориши прогноз қилинган.

Унга кўра, ҳозирда қарийб 1,7 миллион сўм бўлган ўртача пенсия 2027-йилда 1,8 миллион сўмга, 2028-йилда 1,9 миллион сўмга, 2029-йилга келиб эса 2,1 миллион сўмга етиши кутилмоқда.

Пенсия олувчилар сони ҳам ортиб бормоқда. 2026-йилда 4 миллион 427 минг нафарни ташкил этиши кутилаётган пенсионерлар сони 2027-йилда 4 миллион 592 минг, 2028-йилда 4 миллион 760 минг ва 2029-йилга бориб 4 миллион 940 минг нафарга етиши прогноз қилинмоқда.

Ҳудудлар кесимида энг кўп пенсионер Фарғона вилоятида яшайди. Бу ерда ҳар саккиз кишидан бири пенсионер ҳисобланади.

Фарғона, Самарқанд, Андижон ва Қашқадарё вилоятларида мамлакатдаги жами пенсионерларнинг 41 фоизи истиқомат қилади.