Астрономлар ҳажми жиҳатидан деярли Юпитерга тенг, аммо зичлиги пахтақанддан ҳам паст бўлган иккита ноёб сайёрани кашф этди. Бу ҳақда Associated Press хабар бермоқда. Олимларнинг маълум қилишича, ушбу ғайриоддий сайёралар Ердан тахминан 1110 ёруғлик йили узоқликда жойлашган юлдуз атрофида айланади. Улар ўз ўлчамига нисбатан ҳозиргача аниқланган энг енгил сайёралар сифатида қайд этилмоқда. Тадқиқотлар NASAнинг TESS космик телескопи орқали олинган кузатувлар асосида амалга оширилган. Дастлаб мазкур телескоп сайёраларни аниқлаган бўлса, кейинчалик Ердаги қатор телескоплар ёрдамида уларнинг орбитаси ва зичлиги аниқ ҳисоблаб чиқилган. Олимлар ушбу осмон жисмларини «супер-пуфак» сайёралар деб аташмоқда. Бунга сабаб, уларнинг зичлиги ниҳоятда паст бўлиб, ҳатто пахтақанддан ҳам енгил ҳисобланади.

Мутахассислар фикрича, мазкур сайёралар асосан водород ва гелий газларидан ташкил топган бўлиши мумкин. Уларнинг аниқ ранги ҳозирча маълум эмас. Бироқ атмосфераси хусусиятларига қараб, улар оқ ёки кўкимтир тусда намоён бўлиши эҳтимоли мавжуд. Кашф этилган сайёралар Қуёш тизимидан ташқарида жойлашган экзосайёралар синфига мансуб. NASA маълумотларига кўра, бугунги кунга қадар 6300 га яқин экзосайёра тасдиқланган бўлиб, уларнинг атиги 40 тадан кам қисми «супер-пуфак» турига киради. Таққослаш учун, Қуёш тизимидаги энг йирик сайёра — Юпитер ушбу икки сайёрадан қарийб 35 баробар зичроқ ҳисобланади.

Олимлар бундай сайёраларнинг пайдо бўлиш механизми ҳақида ҳам қатор тахминларни илгари сурмоқда. Уларнинг фикрича, бу каби сайёралар янги шаклланаётган юлдузлар атрофидаги газ ва чанғ дискларида ҳосил бўлади. Дастлаб улар газга жуда бой бўлади, кейинчалик эса ўз массасининг катта қисмини йўқотиб, ниҳоятда енгил ва «шишган» сайёраларга айланади. Астрономларнинг таъкидлашича, бундай ноёб сайёраларни ўрганиш Коинотда сайёралар қандай шаклланиши ҳақидаги тасаввурларни янада бойитишга хизмат қилади ҳамда инсониятнинг коинот ҳақидаги билимларини кенгайтиришда муҳим аҳамият касб этади.