Польшада яшаб келган россиялик рассом ва акционист Семён Скрепецкий (асл исми Роберт Кузовков) отиб ўлдирилди. Маҳаллий нашрлар ва ҳуқуқни муҳофаза қилувчи органлар маълумотларига кўра, воқеа Польша шарқидаги Бяла-Подляска шаҳрида содир бўлган.Дастлабки маълумотларга кўра, номаълум шахс рассомга автотураргоҳ ҳудудида яқин масофадан бир неча марта ўқ узган. 

Воқеа жойига етиб келган шифокорлар унинг ҳаётини сақлаб қола олмаган. Ҳодисадан кейин полиция кенг кўламли қидирув ишларини бошлаган.Тергов версияларига кўра, жиноятда икки нафар шахс иштирок этган бўлиши мумкин. Айрим хабарларда гумонланувчилардан бири Беларусь фуқароси экани ва қўлга олингани айтилмоқда. Ҳуқуқ-тартибот идоралари ҳозирча қотилликнинг эҳтимолий сабаблари бўйича расмий хулоса эълон қилмаган.

Семён Скрепецкий сиёсий мавзудаги сатирик асарлари билан танилган бўлиб, у турли йилларда Россия президенти Владимир Путин, Беларусь раҳбари Александр Лукашенко ҳамда бошқа сиёсий шахсларга бағишланган карикатуралари билан кенг муҳокамаларга сабаб бўлган. У 2021 йилдан буён Польшада яшаб келаётган эди.Ҳозирда мазкур қотиллик юзасидан тергов ҳаракатлари давом этмоқда ва воқеанинг барча тафсилотлари ўрганиляпти.