Тошкент ва Самарқанд вилоятларида ўтказилган тезкор тадбирлар давомида йирик миқдордаги гиёҳвандлик воситалари мусодара қилиниб, бир неча нафар гумонланувчи қўлга олинди. Маълум қилинишича, Давлат хавфсизлик хизмати ва Божхона идоралари ҳамкорлигида Тошкент вилоятининг Бекобод шаҳрида ўтказилган операцияда 2025 йилдан буён қидирувда бўлган 1992 йилда туғилган шахс ушланган. 

У ижарага олган хонадон кўздан кечирилганда, ошхонадаги музлатгич ичида 151 грамм “опий”, ҳожатхона шахтасига яширилган ҳолда эса 4 килограмм 971 грамм “гашиш” аниқланган. Дастлабки маълумотларга кўра, ушбу наркотик моддалар қўшни давлатдан контрабанда йўли билан олиб кирилган.Шунингдек, Самарқанд вилоятининг Ургут туманида Давлат хавфсизлик хизмати, Чегара қўшинлари ва ички ишлар органлари томонидан ўтказилган тезкор тадбирда 2003 йилда туғилган икки нафар шахс шартли харидорга 932 грамм “гашиш” ва 2,5 грамм “опий”ни 10 минг АҚШ долларига сотиш вақтида ашёвий далиллар билан ушланган.

Ҳар икки ҳолат юзасидан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланган. Айни пайтда ҳуқуқни муҳофаза қилувчи органлар томонидан тергов ҳаракатлари давом эттирилмоқда.