Буюк Британия ҳукумати болаларни рақамли муҳитнинг салбий таъсиридан ҳимоя қилиш мақсадида 16 ёшгача бўлган шахсларнинг ижтимоий тармоқлардан фойдаланишини қонун йўли билан чеклашни режалаштирмоқда. Мамлакат расмийларига кўра, тегишли қонун лойиҳасини 2026 йил 25 декабрга қадар қабул қилиш, янги тартибни эса 2027 йил баҳоридан амалга киритиш кўзда тутилган.

Бош вазир Кир Стармер ушбу ташаббусни изоҳлар экан, ижтимоий тармоқларнинг болалар руҳияти ва психик саломатлигига таъсири жиддий хавотир уйғотаётганини таъкидлади. Унинг сўзларига кўра, ҳукуматнинг мақсади ёш авлодга соғлом ва хавфсиз болалик муҳитини таъминлашдан иборат.

Таклиф этилаётган чекловлар орасида Snapchat, TikTok, YouTube, X (Twitter), Instagram ва Facebook каби оммабоп платформалар ҳам бор. Агар қонун қабул қилинса, ушбу хизматлар 16 ёшга тўлмаган фойдаланувчилар учун қўшимча чекловлар жорий қилиши талаб этилади.Мутахассислар фикрича, бу каби чоралар болаларнинг интернет хавфсизлигини таъминлаш, кибербуллинг, зарарли контент ва ижтимоий тармоқларга қарамлик каби муаммоларнинг олдини олишга хизмат қилиши мумкин. Аввалроқ Австралия ҳам 16 ёшгача бўлганлар учун шунга ўхшаш чекловларни жорий этган эди.