Самарқанд ва Қашқадарё вилоятларида ҳуқуқни муҳофаза қилувчи органлар томонидан ўтказилган тезкор тадбирлар давомида қалбаки акциз маркалари билан муомалага киритилиши режалаштирилган йирик партиядаги алкоголь маҳсулотлари аниқланиб, мусодара қилинди. 

Маълум қилинишича, Самарқанд вилоятининг Пастдарғом туманида Бош прокуратура ҳузуридаги Департамент ва бошқа идоралар ҳамкорлигида ўтказилган тадбирда масъул шахслар Самарқанд шаҳридаги хонадонлардан бирида қиймати 516 миллион сўмлик, 21 турдаги 21 947 дона қалбаки акциз маркали алкоголь маҳсулотини сотиш мақсадида сақлаб келгани фош этилди. Барча маҳсулотлар ашёвий далил сифатида олиб қўйилди.Шунингдек, Қашқадарё вилоятининг Қарши туманида ўтказилган яна бир тезкор тадбир давомида фуқаро савдо дўконида 26 турдаги 255 дона қалбаки акциз маркали алкоголь маҳсулотини сотувга қўйгани аниқланди. 

Ушбу маҳсулотлар ҳам белгиланган тартибда мусодара қилинди.Ҳолатлар юзасидан Жиноят кодексининг қалбаки акциз маркаларини тайёрлаш ва муомалага киритиш, хавфсизлик талабларига жавоб бермайдиган товарларни сақлаш ва сотиш ҳамда алкоголь маҳсулотларини қонунга хилоф равишда муомалага киритишга оид моддалари билан жиноят ишлари қўзғатилди. Айни пайтда ҳуқуқни муҳофаза қилувчи органлар томонидан тергов ҳаракатлари давом эттирилмоқда.