Кеча Исроил армияси Қатар пойтахти Доҳа шаҳрига бир нечта ҳарбий ва қирувчи самолётлар орқали зарба берган эди.

Халқаро ОАВларнинг берган хабарларига кўра, расмий Доҳа ҳозирда Исроил ҳужумининг оқибатларини бартараф этиш ҳамда унга қарши жавоб ҳужумини йўллашни муҳокама қилмоқда.

Расмий Тел-Авив бу ҳужумни САХАЛ(Исроил миллий мудофаа армияси) амалга оширганини тасдиқлади.

“Кўп йиллар давомида ҲАМАСнинг ушбу раҳбарлари террорчилик ташкилотининг операцияларини бошқариб келган. Улар 7 октябрдаги шафқатсиз қирғин учун ҳам бевосита жавобгардирлар, шунингдек, Исроил давлати билан олиб борилаётган урушни ташкил этиш ва бошқаришда ҳам фаол иштирок этганлар” - дейилади САХАЛ берган баёнотида.

Кейинчалик Қатар ташқи ишлар вазирлиги ҳам расмий баёнот билан чиқиб, “Исроил ҲАМАС сиёсий бюроси офиси жойлашган турар-жой биноларига зарба бериб, Қатар фуқаролари ва хорижий резидентлар ҳаётини хавф остига қўйди. Биз ҲАМАС сиёсий бюроси аъзолари энг юқори даражада учрашув ўтказишга тайёрланаётган пайтда уюштирилган ҳужум бўйича текширув бошладик ва унинг натижалари яқин вақт ичида эълон қилинади” - дея хабар берди.

Шунингдек, мамлакат расмийлари Исроилнинг “Қатар ҳужум ҳақида аввалдан огоҳлантирилган” дея берган баёнотини тўқиб чиқарилган ва мутлақо ёлғон деб таъкидламоқда. ТИВ бу ҳужумга жавоб қайтариш ваколатини ўзида сақлаб қолишини ва аслида қатарликларнинг барчаси бу ҳақда америкалик расмийлардан эшитганини айтиб ўтди.

• Havo hujumi
• Isroil
• Қатар
• hujum