Қирғизистоннинг Жалолобод вилояти қишлоқларида сел содир бўлди. Табиий офат туфайли 300 та уй аҳолиси эвакуация қилинди. Бу ҳақда “Закон.кз” хабар берди.

Қирғизистон Фавқулодда вазиятлар вазирлиги маълумотларига кўра, 17 июнь куни кечки пайт кучли ёмғирдан сўнг Ноокен туманининг Эски-Қўчқор-Ота, Бўстон қишлоқларида лой оқими кучайиб кетган ва болани оқизиб кетган. Соат 19:10 да эса маҳаллий аҳоли ҳаёт белгиларисиз болани топган.

“Эски-Қўчқор-Ота қишлоғида 2014 йилда туғилган К.Э.Ж.нинг жасади маҳаллий аҳоли томонидан топилиб, қариндошларига топширилди”, — дейилади хабарда.

Қутқарувчилар, ички ишлар ходимлари, тез ёрдам бригадалари, фуқаро муҳофазаси ходимлари томонидан даҳшатли сел оқибатлари бартараф этилмоқда. Маҳаллий аҳоли ҳам иштирок этмоқда.

Сел Бишкек-Ўш йўлининг 518-километрини ҳам сув босган, бироқ бир неча соатдан кейин йўл қисми транспорт ҳаракати учун очилган.

Бўстондаги сел Момбеков қишлоғида 2143, Эски Қўчқоротада 500 хонадонни сув босган.

• Қирғизистон
• Сел