Қозоғистон Соғлиқни сақлаш вазирлиги хабар беришича, янги хавфли инфекция Марбург вируси тарқалиши туфайли эпидемиологик вазият устидан назорат кучайтирилган.

Қозоғистон давлат санитария бош врачи Сархат Бейсенованинг таъкидлашича, касалликнинг республикага кириб келиши ва тарқалишининг олдини олиш мақсадида халқаро аэропортларда, давлат чегарасида санитария-карантин назорати амалга оширилмоқда, барча келган йўловчиларни контактсиз ҳарорат ўлчаш йўли билан текшириш ишлари олиб борилмоқда.

Қозоғистон Соғлиқни сақлаш вазирлигига кўра, касалликнинг клиник белгилари вирус юққандан кейин 2-21 кун ичида намоён бўлади. Шунингдек, вазирлик қозоғистонликларга эпидемия тарқалган давлатларга саёҳат қилганда қуйидаги профилактик чораларни кўришни тавсия қилди:

- Вирус юқтирган одамлар билан алоқадан қочиш;

- Африка ўрмонларида яшовчи ёввойи ҳайвонлардан эҳтиёт бўлиш;

- Маҳаллий ҳайвонларнинг гўштини яхши пишмаган ҳолда истеъмол қилмаслик;

- Вирус ташувчи ҳисобланувчи Миср кўршапалаклари яшайдиган ғор ва конларга бормаслик;

- Касаллик аломатлари пайдо бўлганда дарҳол тиббий ёрдамга мурожаат қилиш;

- Шахсий гигиена қоидаларига риоя қилиш.

Шунингдек, Соғлиқни сақлаш вазирлиги Марбург вирусига қарши махсус даволаш усули ва вакцина йўқлигини ҳамда фақат симптоматик даволаш олиб борилишини маълум қилган.

Маълумот учун, касалликнинг асосий симптомлари иситма, томоқ оғриғи, тошма, қорин оғриғи, бурун ва кўздан қон кетиши.

• Қозоғистон
• Вирус