Австралиянинг Мельбурн шаҳрида жойлашган 48 қаватли офис биносининг ташқи деворлари ва томига 1 391 та қуёш панели ўрнатилди. Бурк кўчасидаги 435-уйда жойлашган бинога интеграция қилинган тизим 375 кВтгача электр энергияси ишлаб чиқариши мумкин. У 2026 йил охирида тўлиқ ишга туширилгач, бинонинг электр энергиясига бўлган эҳтиёжининг 20 фоизигача қисмини қоплаши кутилмоқда.

Лойиҳа Австралия ҳукумати томонидан молиялаштирилган бўлиб, кўп қаватли тижорат биноларининг ташқи деворларига қуёш панелларини кенг кўламда ўрнатиш бўйича дунёдаги илк йирик лойиҳалардан бири ҳисобланади. Панеллар бинонинг 2 680 квадрат метрдан ортиқ ташқи майдонини эгаллаган.

Тизим икки томонлама ишлайдиган монокристалли қуёш элементларидан ташкил топган. Панеллар қуёш нуридан электр энергияси ишлаб чиқариш билан бирга, бино ичига ортиқча иссиқлик киришини ҳам камайтиради. Ички юзалардан қайтган ёруғлик панелларнинг орқа томонига тушиб, қўшимча энергия ишлаб чиқаришга хизмат қилади.

Қурувчи Cbus Property компанияси бош директори Крис Какуфаснинг таъкидлашича, лойиҳа бинонинг электр энергияси харажатларини ва электр тармоғидан фойдаланиш билан боғлиқ зарарли чиқиндиларни камайтиришга ёрдам беради.

Мазкур лойиҳа BIPV (Building Integrated Photovoltaics) технологияси асосида амалга оширилган. Ушбу технологияда қуёш панеллари бинонинг ташқи конструкциясига бевосита интеграция қилиниб, бир вақтнинг ўзида қурилиш материали ва электр энергияси манбаи вазифасини бажаради.

Маълумот учун, 2024 йил ноябрь ойида Ғарбий Мельбурнда ҳам ташқи деворларига 1 182 та қуёш панели ўрнатилган саккиз қаватли офис биноси фойдаланишга топширилган эди. Янги лойиҳадаги панелларнинг умумий қуввати эса 375 кВтни ташкил этиб, аввалги шундай лойиҳадаги кўрсаткичдан икки баравар юқори экани қайд этилган.