“Хочу жит” (яшашни истайман) ташкилоти Украинадаги урушда Россия армияси сафида жанг қилган, ҳалок бўлган ёки бедарак йўқолган ўзбекистонлик фуқароларнинг янги рўйхатини эълон қилди.

Маълумотларга кўра, ҳалок бўлган 481 нафар ўзбекнинг шахси аниқланган. Бу рўйхат тўлиқ эмас, аниқ йўқотишлар сони анча кўп бўлиши эҳтимол қилинмоқда.

Ташкилот ҳисоботига кўра, Ўзбекистон бугун Россия армиясида хизмат қилаётган хорижлик ёлланма аскарлар сони бўйича етакчи давлат ҳисобланади. Нодавлат манбалар маълумотларига кўра, камида 2 715 нафар ўзбек фуқароси Россия томонида Украинага қарши жанг қилган ёки ҳозир ҳам иштирок этмоқда.

Улардан 498 нафари 2023 йилда, 941 нафари 2024 йилда ва 2025 йилнинг дастлабки олти ойида деярли 1 300 нафар ўзбек фуқароси Россия билан ҳарбий шартнома имзолаган. Шунингдек, Россия армияси сафида асирга тушган хорижликлар орасида ҳам ўзбеклар сони энг кўп экани қайд этилган.

Ташкилот маълумотича, Россиядаги полиция ва тергов органлари баъзан муҳожирларни иш ваъдаси билан ёки қўрқитиш орқали урушга жалб этмоқда. Айрим ҳолларда бундай фаолият учун моддий мукофотлар ҳам тўланиши қайд этилган. Бу ҳолат инсон савдоси ва меҳнат муҳожирларининг ҳуқуқий ҳимоясизлигини янада кучайтираётгани таъкидланмоқда.

Маълумот учун, Ўзбекистон қонунчилигига кўра, фуқароларнинг чет давлат ҳарбий хизматларига кириши ЖКнинг 154¹-моддасига мувофиқ жиноий жавобгарликка сабаб бўлади. Агар шахс ёлланма ёки шартнома асосида чет эл армияси сафида хизмат қилса, у ҳолда беш йилгача озодликдан маҳрум этилиши мумкин.

• Ўзбекистонлик
• Россия
• Украина
• Уруш
• migrant