Самарқанд шаҳри ва Наманган вилоятида фуқароларни умра зиёратига юборишни ваъда қилиб, улардан пул талаб қилган икки шахс ушланди. Бу ҳақда Давлат хавфсизлик хизмати (ДХХ) маълум қилди.

ДХХ маълумотига кўра, Самарқандда фаолият юритувчи оилавий корхона вакили бир фуқаро ва унинг икки нафар қариндошини Саудия Арабистонига умра зиёратига юборишни ваъда қилган. У сафарни ташкил этиш ва диний амалларни адо этиш учун шароит яратиб бериш эвазига 3 450 доллар талаб қилган. Тезкор тадбир давомида у талаб қилинган маблағнинг 3 минг долларини олаётган вақтда қўлга олинган.

Шунга ўхшаш ҳолат Наманган вилоятида ҳам аниқланган. Наманган туманида фаолият юритувчи масъулияти чекланган жамият раҳбари Учқўрғон туманида яшовчи фуқарони умра зиёратига юборишни ваъда қилиб, ундан 1 350 доллар сўраган. У олдиндан 1 200 доллар олаётган вақтда ушланган.

Самарқанддаги ҳолат юзасидан жиноят иши қўзғатилиб, дастлабки тергов ҳаракатлари олиб борилмоқда. Намангандаги ҳолат бўйича эса терговга қадар текширув ишлари давом этмоқда.