Олий Мажлис Сенати аралашуви натижасида Олтинкўл ва Улуғнор туманларидаги “Ташаббусли бюджет” лойиҳалари бўйича овоз бериш босқичига старт берилди.

Аввалроқ ушбу туманларда ташаббусли бюджет жараёнининг жорий йилги иккинчи мавсумида тақдим этилган лойиҳалар туман ишчи комиссиялари томонидан асоссиз равишда рад этилгани аниқланган. Шу муносабат билан Андижон вилояти ҳокимига лойиҳаларни белгиланган мезонлар асосида қайта кўриб чиқиш юзасидан сенатор сўрови юборилган эди.

Сенатор сўровига мувофиқ лойиҳалар қайта кўриб чиқилди. Натижада Олтинкўл туманида 93 та, Улуғнор туманида 57 та лойиҳа овоз бериш босқичига ўтказилди. Шунингдек, ушбу туманларда 39 та лойиҳа асосли рад этиш хулосаси билан қайтарилди.

“Очиқ бюджет” порталидаги дастлабки маълумотларга кўра, Улуғнор туманида жами 73 та лойиҳа тақдим этилган бўлиб, шундан фақат 13 таси(18 фоиз) овоз бериш босқичига ўтказилган, қолган 60 та лойиҳа эса асослантирилмаган ҳолда рад этилган эди. Худди шунингдек, Олтинкўл туманида 116 та лойиҳанинг фақат 22 таси(19 фоиз) саралашдан ўтган, 94 та лойиҳа эса асослантирилмаган ҳолда рад этилган.

Шу муносабат билан “Очиқ бюджет” порталида мазкур туманлар бўйича саралашдан ўтган лойиҳалар юзасидан овоз бериш жараёни 2025 йил 29 августдан бошлаб йўлга қўйилди.

Эслатиб ўтамиз, овоз бериш жараёни жорий йил 31 август куни соат 23:59 да якунланади.

• Андижон
• Ҳокимлик
• Лойиҳа
• опен бюджет