Эрон 22 октябрь куни Ҳурмуз бўғозида етти нефть танкери ёниб кетгани ёки шикастланганини маълум қилди. Ҳодисаларга Эрон томонидан берилган зарбалар ёки денгиз миналари сабаб бўлгани айтилмоқда. Бу ҳақда AP News хабар берди.

Эрон давлат телевидениесига кўра, Ислом инқилоби қўриқчилари корпуси ҳарбий-денгиз кучлари АҚШ тижорат кемаларининг бўғоздан ўтишига ёрдам бериш давом этса, минтақадаги Америка ҳарбий базаларига зарба бериш билан таҳдид қилган. Ҳодисаларда қурбонлар бор-йўқлиги ҳақида маълумот берилмаган.

Буюк Британиянинг денгиз савдоси операциялари мониторинг хизмати (UKMTO) маълумотларига кўра, октябрь ойида тижорат кемаларига ҳужумлар сони март ойидан бери энг юқори даражага етган. Бироқ хизмат сўнгги ҳодисалар бўйича алоҳида ҳисобот эълон қилмаган.

Эрон ташқи ишлар вазири Аббос Ароқчи 21 октябрь куни мамлакат дипломатияга очиқлигини, шу билан бирга, ўзини ҳимоя қилишга тайёр эканини билдирган. Айни пайтда АҚШ минтақага қўшимча ҳарбий кучлар, жумладан, учинчи авиатаøвчи кема ва минглаб аскарларни юбормоқда.

Воситачилар Вашингтон ва Теҳронни музокараларга қайтаришга уринмоқда. Ҳурмуз бўғозидаги кескинликнинг кучайиши нефть ва бошқа муҳим маҳсулотлар етказиб берилишига таъсир кўрсатиши ҳамда нархлар ошишига олиб келиши мумкин.