Сурункали чарчоқ замонамиз одамларининг аксариятида кузатиладиган ҳолат. Кун бўйи ҳорғин кайфиятда юриш, сабабсиз чарчаш, ҳолсизлик – буларнинг барчаси сурункали чарчоқ аломатларидир. Сурункали чарчоқ мия фаолияти билан боғлиқми ёки жисмоний зўриқиш билан? Бунинг учун энг аввало ўз ҳолатингизни кузатинг. Агар ҳолсизлик 2-3 кун тўйиб дам олганингиздан кейин ҳам бартараф этилмаса, бу ҳақида жиддий ўйлаб кўриш учун етарлича асос бор. Баъзан чарчоқ ҳолатидан бутунлай қутулиш учун бир ҳафталик таътил камлик қилади, ҳолсизлик ортидан бош ва мушакларда оғриқ келиб чиқади.

1. Нотўғри овқатланиш

Организм сиз истеъмол қилаётган егуликларни қувватга айлантириб беради. У ўзи учун керак бўлган витамин ҳамда минералларни қабул қилмайдиган бўлса, сизга қувват етказиб бера олмай қолиши мумкин.

2. Депрессия ва руҳий безовталик

Стенфорд университети олимлари руҳий ҳолат барқарорлигининг бузилиши тана саломатлигига ҳам салбий таъсир кўрсатишини исботлаб беришган. Депрессия ҳолатида бўлган одамлар уйқу бузилишлари, хавотир, безовталик, қўрқув туфайли доимий чарчоқ ҳиссининг асирига айланадилар .

3. Спорт билан шуғулланмаслик

Стенфорд тиббиёт маркази шифокори Жозеф Фойерштейннинг айтишича, тана тетиклиги учун унинг доимий ҳаракатда бўлиши жуда муҳим. Мутахассис ҳар куни энг камида 30 дақиқа жисмоний машқлар билан шуғулланишни тавсия қилади. Бадантарбия – юрак ва ўпкалар саломатлигини рағбатлантиради, миянинг фаол ишлашига ёрдам беради. Спорт билан шуғулланувчи одамларда ҳолсизлик деярли кузатилмайди.

4. Қалқонсимон без касалликлари

Қалқонсимон без организмдаги ҳужайраларга қувват берувчи, метаболизм ва қон босимини меъёрий ҳолатда ушлаб туриш учун жавобгар гормонларни ишлаб чиқаради. Доимий чарчоқ ҳисси ҳам қалқонсимон без касалликларидан бири аломати бўлиши мумкин. Шунингдек, ушбу соҳа касалликлари кескин озиб кетиш, соч тўкилиши, тирноқларнинг мўрт бўлиб қолиши, мушаклардаги оғриқлар ва совуққа нисбатан таъсирчанлик орқали намоён бўлади.

5. Қондаги қанд миқдори билан боғлиқ муаммолар

Мутахассисларнинг айтишларича, инсулинга нисбатан таъсирчанликнинг бузилиши – тез-тез кузатилиб турадиган ҳолат. Одам диабет касаллигидан азият чекмаса ҳам қондаги қанд миқдори билан боғлиқ муаммоларнинг ўзиёқ сурункали чарчоқни келтириб чиқариши мумкин.

Чарчоқ ҳисси билан қандай курашиш керак?

1. Таомномангизни қайтадан кўриб чиқинг.

Нонуштага сули ёрмасидан тайёрланган бўтқа истеъмол қилиш организмдаги стресс гормони – кортизол миқдорини камайтириши ҳақида эшитганмисиз? Кунига 5 марта кам-камдан овқатланинг. Зарурат юзага келган ҳолатда қўшимча равишда витаминлар қабул қилинг.

2. Руҳий ҳолатингиз устида ишланг.

Бу борада сизга руҳшунос кўмаги керак бўлиши мумкин. Ўзингизни бўлар-бўлмасга танқид қилаверманг, кайфиятингиз бўлмаган ҳолатда ёқимли мусиқа тингланг. Қалбингиздаги алам ва ҳасаддан, эски аразлардан халос бўлинг.

3. Тўйиб дам олинг

Компьютер ёки телевизор қаршисида кўп қолиб кетманг, вақтингизни китоб ўқиш, яқинларингиз даврасида бўлиш, сизга бахт ҳиссини бера оладиган нарсалар учун сарфланг. Бир муддат давомида гаджетлар ва смартфондан фойдаланмай турганингиз маъқул. Агар бунинг имкони бўлмаса, фойдаланиш вақтини имкон борича қисқартиринг.

Ушбу чоралар сизга ёрдам бермаган ҳолатда шифокорга мурожаат қилиш тавсия этилади.

• Фойдали
• лайфхак
• қизиқарли
• саломатлик