Узун туманида фуқароларнинг пенсия ва нафақа пулларини “1Xbet” онлайн ўйинларига ишлатиб ўзлаштирган банк кассири ушланди.

Бош прокуратура ҳузуридаги Департамент Матбуот хизмати хабарига кўра, АТ “Халқ банки” Узун филиалининг мурожаатига асосан ўтказилган терговга қадар текширувда, филиалнинг 2-сон сайёр кассаси кассири А.А.нинг жиноий иши фош қилинди.

Хабарда айтилишича, мазкур шахс жорий йилнинг февраль-март ойларида ўзига бириктирилган ҳудудда 278 нафар фуқарога нақд пул кўринишида чиқарилган жами 121,1 млн сўм пенсия ва нафақа пулларини уларнинг номидан сохта имзолар қўйиш орқали ўзлаштириб юборган. Шунингдек, унинг ушбу пулларни интернет тармоғидаги “1Xbet” онлайн казино ўйинларига ишлатиб, талон-торож қилганлиги аниқланиб, текширув давомида департамент аралашуви билан 117 млн сўм қайтарилди.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.

• Жиноят
• Прокуратура
• Қимор
• Сурхондарё
• Xalq banki