Миср суди телебошловчи Сара Ҳалифа ва жиноят иши бўйича яна 11 нафар айбланувчини гиёҳвандлик воситаларини ишлаб чиқариш ҳамда сотишда айбдор деб топиб, ўлим жазосига ҳукм қилди. Бу ҳақда “Ал-Аҳрам” хабар берди.

Суд маълумотларига кўра, айбланувчилар гиёҳванд моддаларни тайёрлаш учун хомашё харид қилиш ва тайёр маҳсулотни сотиш билан шуғулланган уюшган жиноий гуруҳ тузган. Уларга ноқонуний равишда ўқотар қурол сақлаш айблови ҳам қўйилган.

Тергов давомида ҳуқуқ-тартибот идоралари 750 килограммдан ортиқ гиёҳвандлик воситалари ва уларни ишлаб чиқариш учун мўлжалланган хомашёни мусодара қилган. Шунингдек, нарколаборатория сифатида жиҳозланган иккита хонадон ҳамда ўқ-дорилар сақланган лицензиясиз қурол-аслаҳа омбори аниқланган.

Сара Ҳалифа 2025 йил апрель ойида Қоҳирада ҳибсга олинган. У бир нечта телеканалларда бошловчи сифатида фаолият юритган ва Мисрда таниқли медиа шахсларидан бири бўлган.

Ҳалифа ва бошқа судланувчилар суд ҳукми устидан шикоят қилиш ҳуқуқига эга.