Президент Шавкат Мирзиёев раислигида Андижон вилоятини ижтимоий-иқтисодий ривожлантириш, тадбиркорликни қўллаб-қувватлаш ва аҳоли даромадларини ошириш масалаларига бағишланган йиғилиш ўтказилмоқда.

Йиғилишда жорий йилнинг биринчи ярмида вилоят иқтисодиёти 8,8 фоиз, саноат 9,2 фоиз, хизматлар 16,1 фоиз ва инвеститсиялар 8,9 фоизга ўсгани қайд этилди. Шунингдек, давлатимиз раҳбари: «Бизга ўсишдаги рақамлар эмас, балки ҳар бир кўрсаткич ҳар бир оиланинг кундалик ҳаётига қандай ўзгариш олиб киргани муҳим», — деб алоҳида таъкидлади.

Андижонда ер ва табиий бойликлар чекланган бўлса-да, ҳаракатчан аҳоли, кучли тадбиркорлик руҳи, кўп сонли ёшлар, саноат мактаби ва катта бозор каби улкан имкониятлар борлиги қайд этилди. Сўнгги ўн йилда вилоятга республика буджетидан 20 триллион сўм, банклар томонидан тадбиркорлик учун 90 триллион сўм йўналтирилгани, биргина жорий йилда эса аҳоли фаровонлигини оширишга 6 триллион сўм ажратилгани маълум қилинди.

Якунда ҳокимларга берилган ваколатлар ва яратилган молиявий имкониятлар муносиб натижага айланиши шартлиги кўрсатиб ўтилди.